Prezıdent 3 jasar atyraýlyq balaqaıǵa alǵysyn bildirdi
ATYRAÝ. KAZINFORM – Atyraýda turatyn 3 jasar Dinmuhammed Jumajannyń shashylǵan qoqys jınaǵany kópshilikti súısindirgen edi. Prezıdent balaqaıǵa alǵysyn bildirdi.
Atyraý oblysynyń ákimi Serik Shápkenov 3 jasar balaqaı men onyń ata-anasymen kezdesip, Memleket basshysynyń alǵysyn tapsyrdy.
– Memleket basshysynyń «Taza Qazaqstan» bastamasy ýaqytsha is-shara emes, ár azamattyń kúndelikti atqaratyn isine aınalyp otyr. Keıde kóp sózden góri osyndaı naqty qadamnyń áseri ózgeshe bolady. Dinmuhammed áli de oıyn balasy bolsa da, onyń áreketi kópke oı saldy. Bul – otbasyndaǵy tálimdi tárbıeniń jemisi, naǵyz otansúıgishtiktiń úlgisi. Kishkentaı Dinmuhammedtiń shashylǵan qoqys jınaǵany barshaǵa oı saldy, - dedi Serik Shápkenov.
Balaqaıdyń ákesi Erjan Haıroshevtiń aıtýynsha, turǵyndardyń biri ulyn vıdeoǵa túsirip, áleýmettik jelige júktegen.
– Biz ózimiz turatyn shaǵyn aýdanda Oraza aıt meıramyn keń kólemde toıladyq. Sol kezde ulymyzdyń áreketi eldiń yqylasyna bólenedi dep oılamadyq. Onyń tili kesh shyqty. Sosyn balabaqshaǵa berdik. Balabaqshadan úırengeni de bar shyǵar. Óz otbasymyzda da tazalyqqa mán beremiz. Senbilikterden qalmaımyz. Men ulymnyń eldiń patrıoty bolyp er jetkenin qalaımyn, - deıdi Erjan Haıroshev.
Oblys ákimi Dinmuhammedke eskertkish syılyq tapsyryp, ata-anasyna alǵys aıtty.
Atyraý oblysy ákimi baspasóz qyzmetiniń málimetinshe, eldi mekenderdi kógaldandyrýdyń aımaqtyq jospary jasalǵan. Soǵan sáıkes 63 gektar aýmaqqa 145 myń 700 kóshet otyrǵyzý josparlanǵan.
Eske sala ketelik, budan buryn Atyraý mektepteriniń ashanasynda 71 myńnan astam oqýshyǵa dıetalyq tamaq beriletinin jazǵan edik.