Prezıdent 2040 jylǵa qaraı Kaspıı arqyly júk tasymaly tórt ese ulǵaıatynyn aıtty
ASTANA. KAZINFORM – Prezıdent Dúnıejúzilik banktiń baǵalaýynsha, josparlanǵan ınfraqurylymdyq mindetter tolyq júzege asyrylsa, 2040 jylǵa qaraı Kaspıı arqyly júk tasymaly tórt ese ulǵaıatynyn aıtty, dep habarlaıdy Aqorda.
– Orta dálizdi TRIPP kólik bastamasymen ushtastyrý máselesin sarapshylar deńgeıinde talqylaýǵa bolady dep oılaımyn. Bul joba áleýetimizdi arttyrady ári barlyq memlekettiń uzaqmerzimdi múddesine saı keledi, – dedi Qasym-Jomart Toqaev.
Prezıdenttiń pikirinshe, sý problematıkasy – Ortalyq Azııa turaqtylyǵyna qater tóndiretin basty synaqtardyń biri.
– Aldymyzda transshekaralyq sý resýrstaryn basqarýdyń tyń tásilderin ázirleý mindeti tur. Bul jumysta ózara qurmet, teńquqylyq qaǵıdattary negizge alynyp, aımaqtaǵy barlyq eldiń múddesi eskerilýi kerek. Ortalyq Azııanyń sý paıdalaný boıynsha negizdemelik konventsııasyn qabyldaý yntymaqtastyqtyń jańa óńirlik arhıtektýrasyn qalyptastyratyn alǵashqy qadam bolar edi. Qujat jobasy taraptardyń qaraýyna usynyldy. BUU aıasynda Halyqaralyq sý uıymyn qurý bastamasy óte ózekti. Ony halyqaralyq, atap aıtqanda, Ortalyq Azııanyń ortaq ustanymy retinde birge ilgeriletý sý resýrstaryn basqarýdyń jahandyq júıesine qosqan úlesimiz bolmaq, – dedi Prezıdent.
Aıta keteıik, Qasym-Jomart Toqaev jumys saparymen Túrikmenstanǵa bardy.
