Prezıdent: Qazaqstan Qytaı men Eýropany jalǵaıtyn basty logıstıkalyq habqa aınalady
ASTANA. KAZINFORM — Memleket basshysynyń paıymdaýynsha, álem ekonomıkasy túbegeıli ózgeriske ushyrap jatqan kezeńde Qazaqstan men Qytaı ózara senimge, ashyqtyq pen ortaq múddege arqa súıegen ozyq ári tıimdi yntymaqtastyq úlgisin kórsetip otyr. Bul týraly «Qazaqstan-Qytaı» ınvestıtsııalyq forýmynda aıtty.
Osyǵan oraı Prezıdent eki eldiń tabysty seriktestigin odan ári damytýǵa arnalǵan basym baǵyttardy atady. Qasym-Jomart Toqaev, eń aldymen, kólik-logıstıka salasyna toqtaldy.
— Halyqaralyq seriktestermen birge temirjol qýatyn arttyryp, avtomobıl magıstraldary men teńiz porttaryn keńeıtýdi, júk tasymaly avıatsııasyn jáne shekara mańy ınfraqurylymyn damytýdy qolǵa aldyq. Lıanıýngannan Aqtaýǵa deıin Qytaı jaǵalaýyn Kaspıımen baılanystyratyn logıstıkalyq toraptar jelisi qalyptasty. Kóp uzamaı Chendý qalasyndaǵy qazaq-qytaı termınaly osy logıstıkalyq tizbektiń mańyzdy býynyna aınalady. Atalǵan shaharda Qazaqstannyń Bas konsýldyǵyn ashýdy josparlap otyrmyz. Azııa men Eýropa arasyndaǵy zamanaýı kólik baılanysyn túzetin Orta dálizdi órkendetýdi aıryqsha mindet dep sanaımyz, — dedi Prezıdent.
Qasym-Jomart Toqaev búgingi forýmǵa tranzıt aılaqtarynyń ótkizý múmkindigin keńeıtý jumystaryna belsendi atsalysyp jatqan kompanııalar qatysyp otyrǵanyn aıtty. Prezıdent boljam boıynsha 2029 jylǵa qaraı Qytaıdan Eýropaǵa qatynaıtyn konteınerli poıyzdardyń sany úsh myńǵa deıin ulǵaıatynyn málimdedi. Bul jahandyq logıstıka tizbegindegi mańyzdy kólik habtarynyń biri retinde Qazaqstannyń pozıtsııasyn kúsheıtedi.
— Birqatar birlesken bastamalar qazirdiń ózinde naqtylana tústi. Bıyl tamyz aıynda Aral — Kaspıı avtomagıstraliniń qurylysy bastaldy. Jańa baǵdar Shyǵys — Batys jolynyń ótkizý qabiletin birneshe ese arttyrady. Taıaý ýaqytta Moıynty — Qyzyljar, Baqty — Aıagóz temirjoldarynyń qurylysy aıaqtalady. Júk tasymalynyń ashyqtyǵyn «Aqyldy shekara» pılottyq jobasy aıasynda birlese engizilgen tsıfrlyq tehnologııalar qamtamasyz etedi. Qytaılyq Minmetals Logistics korporatsııasymen seriktestik aıasynda júrgizýshisiz kólik tehnologııalaryn jáne tsıfrlyq sheshimderdi qoldanatyn logıstıka dálizi túziledi. Bul — bizdiń elimiz úshin biregeı joba. Mýltımodaldi júk tasymalyn damytýǵa erekshe mán beremiz. Alatau Air Cargo ulttyq avıa júk jetkizýshi kompanııasy jumysyn bastady. Qazaqstan naryǵyna Cathay Pacific Cargo sekildi álemniń júk tasıtyn iri áýe kompanııalary shyǵyp jatyr. Azamattyq avıatsııa da mańyzdy ról atqarady. Bıyl Almaty — Sıan, Almaty — Shanhaı, Astana — Gýanchjoý, Aqtaý — Úrimji reısteri ashyldy. Osy aptada alǵashqy jolaýshylar baǵdary Almaty men Chýntsın qalalaryn tikeleı baılanystyrdy, — dedi Memleket basshysy.
Eske sala keteıik, Prezıdent Qasym-Jomart Toqaev Almatyda «Qazaqstan — Qytaı» ınvestıtsııalyq forýmyna qatysyp jatyr.
Jıyn bastalmas buryn forým qonaqtary Mańǵystaý oblysyndaǵy qaıǵyly oqıǵa saldarynan qaza tapqan áskerı qyzmetshilerdi bir mınýt únsizdikpen eske alyp, rýhyna taǵzym etti.
