Prezıdent: 2027 jyl óte ystyq bolýy múmkin, qaýyp-qaterdi eskerý qajet

ASTANA. KAZINFORM — Elimizdiń azyq-túlik qaýipsizdigin qamtamasyz etý — eń mańyzdy mindet. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.

2027 jyl óte ystyq bolýy múmkin, qaýyp-qaterdi eskerý qajet
Foto: Pixabay

— Qazir kelesi jylǵa jáne odan keıingi orta merzimdi kezeńge arnalǵan álemdegi klımat ahýaly jaıynda túrli boljamdar jarııalanyp jatyr. Klımattyq kún tártibi geosaıasatpen jáne ekonomıkamen tyǵyz baılanysty. Máselen, klımattyń kúrt nasharlap bara jatqanyna jáne aldaǵy qýańshylyqqa baılanysty alańdaýshylyq jıi aıtylady. Aýyl sharýashylyǵyna jasandy ıntellektini engizýge baılanysty pikirimde osyǵan toqtaldym. Keıbir sarapshylardyń pikirinshe, 2027 jyl óte ystyq bolýy múmkin, — dedi Prezıdent.

Qasym-Jomart Toqaevtyń paıymynsha, aýa raıyndaǵy aýytqýlar qýańshylyqqa, órtke, sý tasqynyna dýshar etýi, sonyń saldarynan jahandyq azyq-túlik qaýipsizdigi qıyndyqqa tap bolyp, álemdik jetkizý tizbegi buzylýy yqtımal.

— Aýyl sharýashylyǵyn damytý jáne sý resýrstaryn basqarý isinde biz osyndaı qaýip-qaterlerdiń bárin eskerýimiz kerek. Biz bul máseleni endi qolǵa alyp jatyrmyz. Biraq júrisimiz baıaý. Óıtkeni elimizdiń azyq-túlik qaýipsizdigin qamtamasyz etý — eń mańyzdy mindet. Astanada Islam yntymaqtastyǵy uıymy aıasynda azyq-túlik qaýipsizdigimen aınalysatyn halyqaralyq uıymnyń shtab-páteri ornalasqan. Salalyq mınıstrlik atalǵan uıymmen birge álemdegi kúrdeli ahýaldy eskere otyryp, Qazaqstanǵa jáne bizdiń seriktesterimizge arnalǵan usynymdar ázirleı alady, — dedi Memleket basshysy.