Prezıdent 2015-2020 jyldarǵa otbasylyq qatynastardy nyǵaıtý sharalarynyń jalpyulttyq josparyn ázirleýdi tapsyrdy
ASTANA. QazAqparat - Elbasy óziniń Ákimshiligi men QR Úkimetine eki aıdyń ishinde 2015-2020 jyldarǵa arnalǵan otbasylyq qatynastardy nyǵaıtý boıynsha sharalardyń jalpyulttyq josparyn ázirleýdi tapsyrdy. Bul tapsyrmany Memleket basshysy Nursultan Nazarbaev «Mereıli otbasy» ulttyq baıqaýynyń jeńimpazdaryn marapattaý rásiminde júktedi.
Búginde jastarda moraldyq-ónegelilik, rýhanı qundylyqtardy qalyptastyrý máselesi ózekti ekenine toqtalǵan Prezıdent, jaqsy otbasylarda tárbıe alǵan jasóspirimder kúdikti teris aǵymdardyń jeteginde ketip qalatyn jaǵdaılar kezdesip jatatyndyǵyn atap ótti.
«Bul - búgingi zamannyń qaýip-qateri, sondyqtan da olar memleket pen qoǵamnyń júıelik sharalardy qabyldaýyn talap etedi. Osy oraıda Qazaqstan Respýblıkasy boıynsha 2015-2020 jyldarǵa arnalǵan otbasylyq qatynastardy, moraldyq-etıkalyq, rýhanı-adamgershilik qundylyqtardy nyǵaıtý turǵysynda sharalardyń jalpyulttyq josparyn ázirleý kerek», - dedi Memleket basshysy.
Prezıdent bul jospar qoǵamdyq birlestikterdiń, buqaralyq aqparat quraldarynyń qatysýymen barlyq keshendi jumystardy qamtýy tıis ekenin atap ótti.
«Prezıdent Ákimshiligi men eldiń Úkimetine eki aıdyń ishinde osyndaı usynysty engizýin tapsyramyn», - dep túıdi N. Nazarbaev.
