Prezıdent 106 jastaǵy dıktor Zulqııa Jumatovaǵa «Qurmet» ordenin berdi
ASTANA. KAZINFORM — Memleket basshysy Qasym-Jomart Toqaev buqaralyq aqparat quraldarynyń qyzmetkerlerine Ádiletti, Taza, Qaýipsiz ári Kúshti Qazaqstandy qurý isine orasan zor úles qosyp kele jatqany úshin alǵys aıtty.
— Sizder qoǵamda «Zań men tártip», «Adal azamat» qaǵıdattaryn ornyqtyrýǵa, sondaı-aq «Taza Qazaqstan» tujyrymdamasyn keńinen dáripteýge belsene atsalysyp kelesizder. Sol arqyly halqymyzdyń bolmys-bitimin jáne sanasyn jańǵyrtýǵa zor eńbek sińirip júrsizder. Aldaǵy ýaqytta da aqparat salasynyń mamandary el ıgiligine qyzmet ete beredi dep senemin, — dedi Qasym-Jomart Toqaev.
Búgin Prezıdent Qazaqstan Respýblıkasynyń jýrnalıstıkasy men televızııasynyń damýyna eleýli úles qosqany úshin medıa salasynyń úzdik mamandaryna joǵary memlekettik nagrada berý týraly Jarlyqqa qol qoıdy. Marapattalǵan azamattardyń arasynda sanaly ǵumyryn aqparat salasyna arnaǵan ardager qyzmetkerler de bar.
— Osy tusta ulttyq televızııanyń alǵashqy kásibı mamandarynyń biri, qazaq tilindegi tuńǵysh efırdi júrgizgen maıtalman dıktor Zulqııa Jumatovany erekshe atap ótkim keledi. Búgingi tańda 106 jasqa kelgen ardaqty tulǵany halqymyz aıryqsha qurmetteıdi. Sondyqtan men Zulqııa Muqanqyzyna «Qurmet» ordenin tabystaý týraly sheshim qabyldadym, — dedi Q. Toqaev.
Zulqııa Muqanqyzy Jumatova 1920 jyldyń 20 aqpanynda Pavlodar oblysynyń Baıanaýyl aýdanynda dúnıege kelgen. Ol Almaty telestýdııasy ashylǵan 1958 jyly dıktorlyqqa jarııalanǵan konkýrsqa qatysqan jáne sol kezdegi rejısser Sháken Aımanov Zulqııa Muqanqyzyn dıktorlyqqa 750 úmitkerdiń ishinen tańdap alǵan. Sanaly ǵumyryn osy salaǵa arnaǵan ardager jazýshy Muhtar Áýezovtiń kózin kórip, suhbat alǵan.
— Sondaı-aq qazir ortamyzda otandyq medıanyń mártebesin arttyryp júrgen tájirıbeli azamattar otyr. Olardyń qatarynda Ertaı Ashyqbaev, Tatıana Koretskaıa, Qaırat Musaqulov, Qymbat Dosjan syndy tanymal jýrnalıster bar. Tilshilerdiń jas býyny sizderge qarap boı túzeıdi, — dedi Memleket basshysy.
Aıta keteıik, 28 maýsym — BAQ ókilderiniń kásibı merekesi qarsańynda Memleket basshysy Qasym-Jomart Toqaev jýrnalıster qaýymyn quttyqtady.
Eske sala ketsek, 2019 jyly Prezıdent Qasym-Jomart Toqaev jýrnalısterdiń kásibı merekesin bekitý jóninde Úkimetke tapsyrma bergen bolatyn. Úkimettiń tıisti Qaýlysy jarııalanyp, 28 maýsym kúni Buqaralyq aqparat quraldary qyzmetkerleriniń merekesi atalyp ótetin boldy.
