Prezıdent 1 qyrkúıekke deıin temirjol salasyndaǵy jańa tarıf saıasatyna qatysty sheshim qabyldaýdy tapsyrdy
ASTANA. KAZINFORM — Bıyl 1 qyrkúıekke deıin temirjol salasyndaǵy jańa tarıf saıasatyna qatysty túpkilikti sheshim qabyldaý qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
— Úkimet bıyl tranzıttik tasymal kólemin shamamen 65 paıyzǵa, ıaǵnı 55 mıllıon tonnaǵa deıin kóbeıtemiz degen aýqymdy mindet qoıyp otyr. Al «Qazaqstan temir joly» kompanııasynyń basshysy óz aqparatynda bul josparǵa kúmán keltirip otyr. Másele — bizde emes, irgeles memleketterdiń josparlary men múmkindikterinde. Endi anyqtaý qajet. Osyǵan oraı, «Samuryq-Qazyna» qory men «Qazaqstan temir joly» kompanııasy qajetti sharanyń bárin qabyldaýy tıis. Sonyń ishinde tsıfrlyq jańǵyrtý (ıaǵnı, transformatsııa) jumystaryn aıaqtaýy qajet, — dedi Qasym-Jomart Toqaev.
Memleket basshysy júk tasymaldaýshylardyń bárine ashyq jáne birdeı qoldaý kórsetilýi tıis ekenin basa aıtty.
— Ol úshin ulttyq operatordyń júk vagondaryn berý jumysyn tolyq tsıfrlandyryp, retke keltirý kerek. Temirjol salasyndaǵy tarıf saıasatyn reformalaý — kezek kúttirmeıtin mindet. 1 qyrkúıekke deıin jańa tarıf saıasatynyń tujyrymdamasyna qatysty túpkilikti sheshim qabyldanýy tıis. Tarıf saıasaty, bul — asa mańyzdy taqyryp, kólik strategııamyzdyń ózegi sanalatyn másele, — dedi Prezıdent.
Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.
