Press TV: Iran AQSh-tyń soǵysty toqtatý týraly josparynan bas tartty
ASTANA. KAZINFORM - Iran AQSh-tyń soǵysty toqtatý týraly josparyn qabyldamady. Bul týraly sársenbi, 25 naýryz kúni Irannyń memlekettik Press TV telearnasy habarlady, dep jazady DW.
-Iran AQSh usynysyna teris jaýap berdi, — dep málimdedi telearna.
Tegerandaǵy úkimet ókiliniń aıtýynsha, «soǵys AQSh prezıdenti Donald Tramp qalaǵan kezde emes, Iran sheshim qabyldaǵan kezde ǵana aıaqtalady».
AFP: jospar Iranǵa Pákistan arqyly jetkizilgen
Islam Respýblıkasyna AQSh-tyń 15 tarmaqtan turatyn jospary «Pákistan arqyly» jetkizilgenin AFP agenttigi Islamabadtaǵy eki úkimet ókiline silteme jasap naqtylady.
The New York Times basylymynyń jazýynsha, jospar Ormýz buǵazy arqyly keme qatynasyn qalpyna keltirýdi, sondaı-aq Irannyń ıadrolyq baǵdarlamasyna qatań shekteýler engizýdi qarastyrady. Óz kezeginde ızraıldik Channel 12 telearnasynyń málimetinshe, onyń ornyna Iranǵa qarsy sanktsııalar alynýy tıis. Qujatqa sáıkes, taraptar bir aılyq bitim jarııalap, osy kezeńde Vashıngtonda AQSh usynysy negizinde kelissózder júrgizýi kerek. Josparda Irandaǵy bılikti aýystyrý qarastyrylmaǵan.
London Ormýz buǵazy boıynsha koalıtsııa qurmaq
Osy rette Ulybrıtanııa men Frantsııa Ormýz buǵazy arqyly keme qatynasyn qaıta bastaý máselesi boıynsha kelissózder uıymdastyrýdy josparlap otyrǵany belgili boldy. Ulybrıtanııa Qorǵanys mınıstrligindegi derekkózdiń AFP-ge habarlaýynsha, shamamen 30 eldiń áskerı ókilderi qatysatyn kezdesý apta sońyna deıin ótýi múmkin. Negizgi maqsat — buǵazdy ashý úshin koalıtsııa qurý.
Ótken aptada Ulybrıtanııa, Frantsııa, Germanııa, Italııa, Japonııa jáne Nıderland «qaýipsiz ótýdi qamtamasyz etý úshin tıisti sharalar qabyldaýǵa» daıyn ekenin málimdedi. Keıin bul bastamaǵa taǵy 24 el qosylǵan.
- Bul koalıtsııany biriktirýde mańyzdy ról atqaryp otyrǵanymyzdy túsinemiz, — dedi Ulybrıtanııa Qorǵanys mınıstrliginiń ókili.
The Times gazetiniń málimetinshe, London kezdesýdi Portsmýtta nemese Londonda ótkizýge usynys jasaǵan.
BUU Bas hatshysy arnaıy ókil taǵaıyndady
Sonymen qatar BUU Bas hatshysy Antonıý Gýterrısh Irandaǵy soǵysty retteý úshin arnaıy ókil taǵaıyndady. Frantsýz dıplomaty Jan Arno osy baǵytta uıym atynan jumys júrgizedi.
-Bul soǵys baqylaýdan shyǵyp ketti, — dedi Gýterrısh.
Ol AQSh pen Izraıldi áskerı áreketterdi toqtatýǵa shaqyryp, Irannan Parsy shyǵanaǵyndaǵy elderge jasalatyn shabýyldardy doǵarýdy talap etti. Buǵan deıin Jan Arno BUU-nyń Aýǵanstan, Kolýmbııa jáne Bolıvııadaǵy ókili qyzmetterin atqarǵan.
WSJ: Irannyń jańa talaptary
Buǵan deıin The Wall Street Journal basylymy derekkózderge súıene otyryp, Tegerannyń AQSh-pen yqtımal kelissózder aldyndaǵy jańa talaptaryn jarııalaǵan bolatyn. Olardyń qatarynda — Parsy shyǵanaǵyndaǵy barlyq amerıkalyq bazalardy jabý, AQSh pen Izraıldiń Iranǵa jasaǵan soqqylary úshin ótemaqy tóleý, sondaı-aq Ormýz buǵazy arqyly ótetin kemelerden aqy alý talaptary bar.
Sonymen qatar Iran sanktsııalardy tolyq alyp tastaýdy, ıadrolyq baǵdarlamasyn tolyq saqtaýdy, soǵystyń qaıta bastalýyna jol bermeıtin kepildikterdi jáne Lıvandaǵy «Hezbolla» tobyna qarsy shabýyldardy toqtatýdy talap etedi.
23 naýryz kúni Donald Tramp Iran basshylyǵymen «ónimdi kelissózder» ótkenin málimdedi. Ol sondaı-aq Irannyń energetıkalyq ınfraqurylymyna soqqy jasaýdy bes kúnge toqtata turý týraly tapsyrma bergen. Alaıda Tegeran kelissózder bolǵanyn joqqa shyǵaryp, «ondaı kelissózder bolǵan joq jáne joq» dep málimdedi.
Qazirgi tańda Ormýz buǵazy arqyly álemdik munaı men suıytylǵan gaz qorynyń shamamen 20 paıyzy tasymaldanatyn negizgi baǵyttaǵy qozǵalys Taıaý Shyǵystaǵy soǵys jaǵdaıyna baılanysty is júzinde tolyq toqtaǵan.
AQSh pen Izraıldiń Iranǵa qarsy soǵysy
28 aqpannan bastap AQSh pen Izraıl Iran aýmaǵyna áýeden soqqy jasap keledi. Sonyń saldarynan Irannyń joǵarǵy kóshbasshysy aıatolla Álı Hameneı men birqatar joǵary laýazymdy sheneýnik pen kúshtik qurylym ókilderi qaza tapqan.
Iran buǵan jaýap retinde Parsy shyǵanaǵyndaǵy kórshi memleketterge zymyrandar men drondar arqyly soqqy jasap jatyr. Islam Respýblıkasynyń málimdeýinshe, negizgi nysana — aımaqtaǵy amerıkalyq áskerı bazalar. Sonymen qatar birqatar eldegi munaı qoımalary men munaı tankerleri de shabýylǵa ushyraǵan. Soǵys bastalǵaly Iran shabýyldarynan Ázerbaıjan men Eýroodaqqa ýaqytsha tóraǵalyq etip otyrǵan Kıpr de zardap shekken.
Al osy ýaqytta Kýba áskeri AQSh tarapynan bolýy múmkin agressııaǵa daıyndalyp jatyr
