Premer: Tehnıkany lızıngke alýdyń nesıe mólsherlemesi 5 paıyzdan aspaý kerek
ASTANA. KAZINFORM – Premer-mınıstr Oljas Bektenov Úkimet otyrysynda kóktemgi egis jumystaryna qajetti dızelge ótinim jiberip úlgermegenderge taǵy múmkindik berilý kerektigin aıtty.
«Aqparattyq júıe arqyly jeńildikti dızel otynyn alý úshin ótinim berýge úlgermeı qalǵan oblys ákimdikteri men eginshilerdiń tarapynan ótinishter kelip túsýde. Olarǵa atalǵan rásimderden ótip, janarmaı alýǵa múmkindik berý kerek.
Energetıka, Aýyl sharýashylyǵy mınıstrlikteri men oblys ákimdikteri arzandatylǵan otynnyń bólingen kólemin jetkizýdi baqylaýǵa alyp, operatorlardyń ony der kezinde tıep-jóneltý jumystaryn qamtamasyz etýge tıis», - dedi Premer-mınıstr.
Sondaı-aq, ol Aýyl sharýashylyǵy mınıstrligine oblys ákimdikterimen birlesip, egis alqaptaryndaǵy jemshóp daqyldarynyń úlesin arttyrýdy tapsyrdy.
«Sý resýrstary mınıstrligi múddeli memlekettik organdarmen birlesip, vegetatsııalyq kezeńde ońtústik óńirlerdi sýarmaly sýmen turaqty túrde qamtamasyz etý jóninde sharalar qabyldaýy qajet.
Ulttyq ekonomıka, Qarjy mınıstrlikteri jáne «Báıterek» holdıngi 1-shi mamyrǵa qaraı aýyl sharýashylyǵy tehnıkasynyń jeńildikti lızıngin qarjylandyrýǵa qarajat bólsin. Onyń túpkilikti qaryz alýshy úshin stavkasy 5%-dan aspaýǵa tıis. Bul aýyl sharýashylyǵy tehnıkasyn jańartýǵa qosymsha serpin beredi.
Qarjy, Ulttyq ekonomıka, Aýyl sharýashylyǵy mınıstrlikteri zamanaýı agrotehnologııalardy saqtaýdy yntalandyrý maqsatynda 1-shi maýsymǵa deıin tıisti sýbsıdııalar bólý máselesin sheshýge tıis», - dedi Úkimet basshysy.
