Premer-mınıstrdiń sózi dollardyń qymbattaýyna áser etti me — Roman Sklıardyń jaýaby

ASTANA. KAZINFORM — Premer-mınıstrdiń orynbasary Roman Sklıar Úkimet úıindegi baspasóz máslıhatynda Úkimet basshysy Oljas Bektenovtiń teńge baǵamy men munaı baǵasy týraly málimdemesinen keıin dollar kúrt qymbattady degen syndarǵa jaýap berdi.

— Premer-mınıstrdiń sózi dollar baǵamynyń ósýine túrtki boldy dep baılanystyrý kem degende baıypty paıym emes, — dedi ol BAQ ókiliniń suraǵyna bergen jaýapta.

Birinshi vıtse-premer óz boljamyn da aıtty.

— Dollar baǵamynyń qansha bolatyny týraly meniń pikirime kelsek, Ulttyq bank bılik ıerarhııasyndaǵy jeke dara qurylym ekenin túsinýińiz kerek. Ol Úkimetke baǵynbaıdy. Aqsha-nesıe saıasatyn qalaı júrgizý kerek dep eseptese, solaı júrgizedi. Ol saıasattary durys pa, teris pe degen suraq tóńireginde uzaq daýlasýǵa bolady. Al meniń jáne meniń áriptesterimniń boljamy dollar baǵamy bári bir qaıta túsedi degenge saıady. Qazirgideı joǵary bolmaıdy. Teńge baǵamynyń turaqtanǵan sátin buǵan deıin de talaı kórdik. Ulttyq bank ol úshin bárin isteıdi, naryq ózi-aq retteıdi dep oılaımyn, — dedi Roman Sklıar.

Eske salsaq, Oljas Bektenov Qazaqstan damýynyń bazalyq stsenarıi boıynsha dollar baǵamy 540 teńge, bir barrel munaıdyń baǵasy 60 dollar dep belgilengenin aıtqan edi.