Premer-mınıstrdiń orynbasary Pavlodar oblysyndaǵy EKSJ jobalarynyń iske asyrylýyn tekserdi
PAVLODAR. KAZINFORM — QR Úkimet basshysynyń orynbasary Qanat Bozymbaev Pavlodar oblysyna jumys sapary aıasynda Aqsý men Pavlodar qalalarynda bolyp, «Energetıkalyq jáne kommýnaldyq sektorlardy jańǵyrtý» ulttyq jobasyn (EKSJ) iske asyrý barysymen tanysty.
Pavlodar oblysy sońǵy 30 jylda alǵash ret ınjenerlik ınfraqurylymnyń tozý deńgeıiniń ósýin toqtatyp qana qoımaı, ony kezeń-kezeńimen tómendetýge qol jetkizip otyr. Bul kommýnaldyq salany jańǵyrtý jónindegi Ulttyq jobany iske asyrý nátıjesinde múmkin bolǵan.
Aımaqta 2025-2027 jyldary jalpy quny 131,6 mlrd teńge bolatyn 55 jobany júzege asyrý kózdelgen. Jobalar sany men bólingen qarjy kólemi boıynsha Pavlodar oblysy respýblıkadaǵy kóshbasshy óńirlerdiń qatarynda tur.
Máselen qazirgi ýaqytta Aqsýda 1980 –shi jyldary salynǵan ortalyq magıstraldyń biri jańǵyrtylyp jatyr. Mundaǵy jelilerdiń is-júzindegi tozýy 83%-ǵa jetken, sońǵy úsh jylda bul ýchaskede 19 zaqymdaný oqıǵasy bolǵan. Nysan 9 myńnan astam turǵyndy, 28 kóppáterli úıdi jáne 8 áleýmettik nysandy jylýmen qamtamasyz etedi. Jobanyń iske asyrylý kólemi shamamen 30%-dy quraıdy.
Vıtse-premer Qanat Bozymbaev qurylys qarqynyna qatań baqylaýdy qamtamasyz etýdi jáne jumystardy bıyl 1 tamyzǵa deıin aıaqtaýdy tapsyrdy. Jańǵyrtý jumystary jylý shyǵynyn 15-20%-ǵa tómendetýge jáne qalanyń búkil júıesiniń tıimdiligin arttyrýǵa múmkindik beredi.
Al Pavlodar qalasyndaǵy eń problemaly ári tozyǵy jetken jylý jelileriniń biri — TM-20 magıstrali qaıta jańǵyrtýdan ótip, iske qosyldy. Buǵan deıin paıdalanylyp kelgen eski jylý magıstraliniń tozý deńgeıi 90%-ǵa jetken bolatyn. Sonyń saldarynan sońǵy úsh jyldyń ishinde bul ýchaskede 78 tehnologııalyq aqaý men apattyq jaǵdaı tirkelip, qys mezgilinde qala turǵyndaryn jylýmen qamtýda qıyndyqtar týyndap kelgen. Strategııalyq nysandy qaıta qurý jobasynyń quny — 9,7 mlrd teńge. Aýqymdy qurylys-montaj jumystary 2025 jyly bastalyp, qazirgi ýaqytta tolyq aıaqtalǵan. Joba aıasynda JEO-1-den NO-52 ýchaskesine deıingi aralyqta dıametri 1000 mm bolatyn 6 shaqyrym qubyr tolyq aýystyrylǵan. Nysan alǵashqy jylytý maýsymyn apattyq jaǵdaılarsyz, sátti ótkerdi.
Sapar barysynda óńirdiń jalpy kórsetkishteri qaraldy. Pavlodar oblysy boıynsha EKSJ platformasynda barlyǵy 69 joba qalyptastyrylǵan. Jalpy somasy 43,9 mlrd teńgege 38 joba iske asyrylýǵa tolyq daıyn. Qazirgi kezde 6 joba belsendi qurylys kezeńinde.
Ulttyq jobanyń ekonomıkasy men tarıftik saıasatyn baǵalaı otyryp, Premer-Mınıstrdiń orynbasary búgingi tańda tarıfterdiń ósýi kásiporyndardyń ınvestıtsııalyq qajettilikterin ótemeıtinin, alaıda halyqqa túsetin júkteme qatań baqylaýda jáne negizdelgen bolýy tıis ekenin atap ótti.
— Bul jerde ekiushty jaǵdaı týyndap otyr: tarıfterdi onsha kótere almaısyń, sebebi ol halyq pen kásiporyndardyń tólem qabilettiligine negizdeledi, biraq ınfraqurylym da eskiredi. Bıyl el boıynsha tirshilikti qamtamasyz etý júıelerin jańartýǵa shamamen 1,14 trıllıon teńge ınvestıtsııa bólinedi. Bul jyl saıyn bólinetin qarjydan birneshe ese kóp. Bizdiń mindetimiz — 2029 jylǵa qaraı respýblıka boıynsha kommýnaldyq jelilerdiń tozýy deńgeıin 50%-dan ári tómendetý, — dedi Qanat Bozymbaev.
Premer-Mınıstrdiń orynbasary tarıfterdiń ózgerýi kezinde halyqtyń áleýmettik osal toptaryn qorǵaýǵa erekshe nazar aýdarý kerektigin eskertti. Qazaqstanda turǵyn úı járdemaqylary júıesi jumys isteıdi, ol qazir tolyǵymen tsıfrlandyrý formatyna kóshirilip jatyr.
— Turmysy jaqsy adamdar tarıfti tıisinshe tolyq tóleýi kerek, al tabysy az azamattar memleket qorǵaýynda bolady. Eger bir otbasynyń kommýnaldyq qyzmetterge jumsaıtyn shyǵyny belgilengen shekten (ortasha eseppen jalpy tabysynyń 10%-ynan) asyp ketse, odan asqan somanyń bárin ákimdik jergilikti bıýdjetten turǵyn úı sýbsıdııasy retinde tólep beredi. Qazir Eńbek jáne halyqty áleýmettik qorǵaý mınıstrligi bul qyzmetti tsıfrlyq formatqa kóshirip jatyr, kúzge deıin ol eGov portalynda qoljetimdi bolady. Osylaısha, ótinim boıynsha kómek avtomatty túrde esepteletin bolady, — dep qorytyndylady Qanat Bozymbaev.
Jumys saparynyń qorytyndysy boıynsha qurylys kestelerin qatań saqtaý jáne oblystyń búkil kommýnaldyq ınfraqurylymynyń úzdiksiz jumysyn qamtamasyz etý jóninde naqty tapsyrmalar berildi.
Eske sala keteıik, Qanat Bozymbaev Pavlodar oblysyna jumys sapary aıasynda búgin tańerteń Ekibastuz qalasynda bolyp, jańaryp jatqan jylý jelilerimen tanysty.
