Premer-mınıstrdiń orynbasary QQS boıynsha sheshim qabyldaý merzimine túsinik berdi

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın qosymsha qun salyǵy boıynsha sheshim qabyldaý merzimine túsinik berdi.

Búgin Senattyń jalpy otyrysynan keıingi baspasóz máslıhatynda tilshiler QQS-ty kóterý bastamasyn kim jasaǵanyn surady. Óz kezeginde S.Jumanǵarın bul bastama Úkimet jaǵynan usynylǵanyn aıtty.

- Bıylǵy 28 qańtardaǵy Úkimettiń keńeıtilgen otyrysynda baıandama jasadym, bárin anyq aıttym. Meniń baıandamamda 20 paıyz týraly bir sóz aıtylǵan joq. Qazir bıznes ókilderimen, sarapshylarmen, óz aramyzda pikir almasý bolyp jatyr. Sodan keıin Úkimet óziniń sheshimin qabyldap, Parlamentke engizgen kezde málim bolady. Prezıdent iri bıznes ókilderimen kezdesedi. Sodan keıin men «Atameken» alańyna shyǵyp, bul taqyryp boıynsha túsinik beremin. Kelesi aptadan bastap alty jumys toby búkil óńirge saparmen barady. Óńirlerde bıznes ókilderimen kezdesemiz. Onyń arasynda máslıhat depýtattary da bar. Olarmen bárin talqylaımyz. Sodan keıin pikir almasyp, sheshim qabyldaımyz, - dedi S.Jumanǵarın.

Onyń aıtýynsha, qazir QQS-tiń deńgeıine qatysty naqty aıtý erte. Bul turǵyda tilshiler qosymsha qun salyǵyna qatysty sheshim qabyldaý merzimin surady.

- Jaqynda bolǵan baspasóz máslıhatynda shamamen aıtqan edim. 20 aqpanǵa deıin Parlament Májilisine engizýimiz kerek. Sebebi onda qazir Salyq kodeksin tolyqtyrýǵa qatysty zań jobasy jatyr. Soǵan bizdiń túzetýlerimiz qosymsha bolady, - dedi Úkimet basshysynyń orynbasary.

Eske salsaq, jaqynda Serik Jumanǵarın qosymsha qun salyǵy shegin nelikten kóterý qajet ekenin túsindirdi.

Úkimet qosylǵan qun salyǵyn 20 paıyz kóterý degen sheshimge áli naqty kelgen joq.