Premer-mınıstrdiń birinshi orynbasary ShQO-daǵy birqatar mańyzdy nysandy aralady
ASTANA. KAZINFORM — QR Premer-mınıstriniń birinshi orynbasary Nurlybek Nálibaev Premer-mınıstrdiń tapsyrmasymen Shyǵys Qazaqstan oblysyna jumys saparymen bardy. Bul týraly Úkimettiń baspasóz qyzmeti habarlady.
Memleket basshysynyń qoldaýymen qolǵa alynǵan aımaqtardaǵy ınvestıtsııalyq, ınfraqurylymdyq jobalar eń aldymen halyqtyń turmys-tirshiligin jaqsartýǵa baǵyttalǵan.
Jobalardy júzege asyrý barysy Premer-mınıstrdiń baqylaýynda. Áýeli Rıdder jylý elektr ortalyǵyndaǵy jylytý maýsymyna daıyndyq barysy tekserildi. Munda № 5 jáne № 6 qazandyq agregattaryna kúrdeli jóndeý jasalyp, 3,3 shaqyrym jylý jelileri jańartylyp jatyr.
— Shyǵysta qys erte túsetindikten, jylytý maýsymyna daıyndyq barlyq talaptarǵa saı júrgizilýi tıis. Basty mindetterimizdiń biri — jylytý maýsymyn eshqandaı aqaýsyz, apatsyz ótkizý. Sebebi bul másele Memleket basshysynyń nazarynda, Premer-mınıstrdiń qatań baqylaýynda, — dedi Nurlybek Nálibaev.
«Kaztsınk» kompanııasynyń Dolınnyı kenishinde jáne BearLog demalys bazasynda qaýipsizdikti qamtamasyz etý tetikteri jáne óndiristegi táýekelderdi azaıtýda qoldanylatyn zamanaýı tehnıkalar tanystyryldy. Kásiporynda óndiristi avtomattandyrýǵa basymdyq berilgen. BearLog demalys bazasy osy jyldyń qańtar aıynda ashylǵan. Bul jerge shańǵy men snoýbordty arnaıy daıyndalmaǵan betkeılerde syrǵanaýdy unatatyn frıraıd áýesqoılary keledi. Onyń ishinde Eýropa elderiniń týrısteri de bar. Osyndaı nysandardy damytý Shyǵys Qazaqstan oblysynyń týrıstik áleýetin arttyryp, Rıdderdi elimizdegi jyl boıy belsendi demalys uıymdastyrylatyn mańyzdy ortalyqtardyń birine aınaldyrady.
Ary qaraı jumys sapary Óskemende, ıaǵnı qaladaǵy temirjol vokzaly, jolaıryq, jylý qazandyǵy jáne turǵyn úı qurylysy nysandarynda jalǵasty. «Óskemen-1» temirjol vokzalyn qaıta jańǵyrtý aıaqtalǵannan keıin aýmaǵy eki eseden astam ulǵaıady. Munda zamanaýı kútý zaldary, jolaýshylarǵa arnalǵan jaıly oryndar jasalyp, ınjenerlik jeliler tolyq jańartylady jáne vokzal mańy abattandyrylady. Nysandy kelesi aıdyń sońyna deıin paıdalanýǵa berý josparlanyp otyr. Óskemendegi Sátbaev dańǵyly men Jibek joly kóshesiniń qıylysynda salynyp jatqan eki deńgeıli jolaıryq — oblys ortalyǵyndaǵy eń qarqyndy qozǵalys ýchaskeleriniń biri. Jolaıryq jol qozǵalysy qaýipsizdigin jaqsartýǵa jáne júrgizýshilerdiń jol júrý ýaqytyn qysqartýǵa múmkindik beredi. Qurylys osy jyldyń sońyna deıin aıaqtalady. Jumys sapary kezinde «Shyǵys Jylý» AQ № 2 qazandyǵynda aldaǵy jylytý maýsymyna daıyndyq barysy, jabdyqtardyń tehnıkalyq jaı-kúıi jáne turǵyndardy úzdiksiz jylýmen qamtamasyz etý baǵytynda qabyldanyp jatqan sharalar týraly baıandaldy. Óskemenniń sol jaǵalaý bóligindegi «Nurly jol» shaǵyn aýdanynda búginde ondaǵan kópqabatty turǵyn úı paıdalanýǵa berilgen.
Sonymen qatar oblystyq drama jáne opera teatry, ońaltý ortalyǵy, Nazarbaev Zııatkerlik mektebi, jalpy bilim beretin mektep salyndy. Qazirgi ýaqytta hokkeı modýliniń qurylysy aıaqtalýǵa jaqyn. Aldaǵy ýaqytta jańa balabaqshalar, mektepter, emhana jáne órt sóndirý deposyn salý kózdelgen. Endigi meje — jańa turǵyn úılerdiń qurylys merzimi men sapasyn qatań baqylaýda ustaý. Katonqaraǵaı aýdanynda Prezıdent tapsyrmasymen salynyp jatqan áýejaıdyń qazirgi tańda qurylys-montajdaý jumystarynyń 64%-y oryndalǵan. Ushý-qoný jolaǵynyń, rýldeý jolynyń jáne perronnyń negizgi bóliginde jumys aıaqtalǵan. Termınal men qosalqy ǵımarattar qurylysy jalǵasýda. Memleket basshysynyń tikeleı tapsyrmasymen júzege asyp jatqan jobanyń sapasyna basa mán berý tapsyryldy. Bul áýejaı Qatonqaraǵaıdyń ǵana emes, elimizdiń kólik ınfraqurylymyndaǵy mańyzdy nysandardyń birine aınalmaq. Sol sebepti qurylys qarqynyn kúsheıtip, jumysshylar sanyn arttyrý qajet. Birinshi jeltoqsanǵa deıin barlyq jumys, asfalttaý, betondaý jáne ınjenerlik kommýnıkatsııalar qyrkúıekke deıin tolyq aıaqtalýy tıis. «Katonqaraǵaı» memlekettik ulttyq tabıǵı parkindegi kóshpeli keńeste «Pana Katon Karagay» jobasy tanystyryldy. Onyń aıasynda 70 sharshy shaqyrym jańa týrıstik kenttiń qurylysy bastalyp, 500-den astam jańa jumys orny ashylady.
Al «ULAR PARK» týrıstik kesheni jobasy sheńberinde 13 kapsýladan turatyn jazǵy qonaqúı qurylysy bıyl aıaqtalsa, 3 mlrd teńgege salynatyn 150 adamǵa arnalǵan qysqy qonaqúı 2028 jyly salynyp bitedi. Bul jobany qolǵa alǵan «ULAR PARK HOTEL» JShS Berel men Arshaty aýyldarynyń arasyna 1,5 mlrd teńgege elektr jelisiniń, jol jáne kópir qurylysyn júrgizgen. Endigi kezekte jobalar sóz kúıinde qalmaı, júzege asýy tıis. Kóshpeli keńesti ótkizýdegi maqsat — týrızmdi damytýǵa serpin beretin usynystardy iriktep, qoldaý kórsetý.
Aıta ketelik Nálibaev Abaı oblysyndaǵy ınfraqurylymdyq jobalardyń júzege asyrylý barysymen tanysqan edi.
