Premer-Mınıstr jylý nysandaryndaǵy apat týraly: Jylý berý tolyq toqtap qalǵan joq
Premer-Mınıstr Álıhan Smaıylov Úkimet otyrysynda jergilikti ákimdikterdi halyqqa jylý nysandarynyń jumysy týraly málimetti der kezinde berip otyrýǵa mindettedi, dep habarlaıdy Kazinform.
«Jalpy elimizde kún kúrt sýytyp ketti. Osyǵan baılanysty kommýnaldyq júıelerge túsetin júkteme de arta túsedi. Mundaı kezde jylý jáne energııa obektilerinde shtattan tys jaǵdaılar bolatyny málim. Tehnologııalyq aqaýlarǵa baılanysty ıntsıdentter bolyp jatyr. Biraq jylý berý tolyqtaı toqtap qalǵan joq. Buzylǵan ýchaskelerdi normatıvtik merzimde qalpyna keltirý boıynsha shuǵyl sharalar qabyldandy. Ákimdikter tirshilikti qamtamasyz etetin barlyq júıelerdiń jumysyn erekshe baqylaýda ustaýy qajet. Avarııa bolǵan jaǵdaıda barynsha shuǵyl áreket etip, tıisti sharalar qabyldaý kerek. Halyqqa naqty jaǵdaı týraly, jóndeý jumystary men josparly jumystar týraly der kezinde, obektıvti ári túsinikti aqparat berý – mańyzdy másele. Áıtpese ótirik aqparat pen feık tarap ketedi», - dedi Úkimet basshysy.
Sondaı-aq ol «Qazaqstan temir joly» jáne «Qazmunaıgaz» ulttyq kompanııalary birinshi kezekte jylý stantsııalary men qazandyqtarǵa otyndy ýaqytyly jetkizý kerektigin atap ótti.
«Óńir ákimdikteri jylý obektileriniń ıelerimen birge turaqty jumys isteıtin jóndeý brıgadalarynyń bolýyn, shuǵyl jóndeý jumystary qajet bolǵan jaǵdaıda qosalqy bólshekterdiń ázir turýyn qamtamasyz etýi kerek. Qysqy jylytý maýsymynyń turaqty ótýi árbir óńir ákiminiń jeke baqylaýynda bolýy tıis», - dedi Álıhan Smaıylov.
