Premer-mınıstr jylý berý maýsymyna daıyndyǵy tómen óńirlerdi synady

ASTANA. KAZINFORM — Jylý berý maýsymyna daıyndyq boıynsha ákimder tarapynan josparlaýdyń nashar bolýy men qatań baqylaýdyń joq ekeni baıqalyp otyr. Bul týraly búgin Úkimet otyrysynda Premer-mınıstr Oljas Bektenov aıtty.

- Memleket basshysy halyqqa Joldaýynda energetıkalyq ınfraqurylym men kommýnaldyq sharýashylyqty jańǵyrtý mindetin qoıdy. Energetıka sektorynda tozý dárejesi joǵary bolýyn eskere otyryp, jylytý maýsymyna daıyndyq jumystary josparly ári sapaly júrgizilýi qajet. «Tarıfti ınvestıtsııaǵa aıyrbastaý» baǵdarlamasy aıasynda elektr stantsııalaryn jóndeý men jańǵyrtý úshin bıyldyń ózinde 377 mlrd teńge qarjy bólindi, bul ótken jyldan 15%-ǵa joǵary. Sondaı-aq Úkimet rezervinen jylý kózderi men jylý jelilerin jóndeýge shamamen 48 mlrd teńge qarastyrylǵan. Soltústik aımaqtarda jylytý maýsymy bastalǵanǵa deıin bir aıdan az ýaqyt qaldy. Alaıda, birqatar óńirde jóndeý jumystary ýaqtyly aıaqtalmaı qalý qaýipi bar, - dedi O. Bektenov. 

Osy oraıda ol ákimderge jumysty barynsha jeldetýdi tapsyrdy. Máselen, Aqmola oblysynda Stepnogorsk jylý elektr ortalyǵynda rezervtik qazandyqty jóndeý jumystary áli aıaqtalǵan joq. Mańǵystaý oblysynda 2-shi jylý elektr ortalyǵynda eki týrbınany jóndeý merzimi aýystyryldy. Sondaı-aq Aqtaý qalasynda jylý jelilerin jańǵyrtý jumystarynyń qarqyny tómen.

- Mundaı máseleler ár óńirde bar. Bundaı jaǵdaılar ákimder tarapynan josparlaýdyń nashar bolýy men qatań baqylaýdyń joq ekenin kórsetedi. Keıbir oblystarda qysqa daıyndyq boıynsha Óńirlik shtabtardyń jumystary mardymsyz bolyp otyr. Tıisti úılestirý men baqylaýdy júrgizý arqyly kóp máseleni ýaqytyly sheshýge bolady. Bıyl mamyrda jabdyqtardy jóndeý merzimin negizsiz aýystyrýǵa jol bermeý tapsyrylǵan bolatyn. Alaıda, «KEGOC» kompanııasy energııa kózderindegi jóndeý jumystarynyń merzimderin uzartýǵa ruqsat berýdi jalǵastyrýda. Bul oryndaýshylyq tártiptiń tómendigin jáne tıisti baqylaýdyń joq ekenin kórsetedi. Merzimderdi buzý nemese olardy negizsiz aýystyrýdyń árbir faktisi boıynsha Energetıka mınıstrligi qatań sharalar qabyldaýy qajet, - dedi Úkimet basshysy.

Budan buryn habarlanǵandaı, Úkimette jylý berý maýsymyna daıyndyǵy tómen óńirler ataldy.