Premer-mınıstr jyl sońyna deıin jańa vagondardy jetkizýdi tapsyrdy
ASTANA. KAZINFORM – Stadler kompanııasynyń jańa vagondaryn jetkizýdi budan ári keshiktirýge bolmaıdy. Bul týraly Úkimet otyrysynda Premer-mınıstr Oljas Bektenov málim etti.
- Sońǵy birneshe jyl boıy temirjol ınfraqurylymynyń damýy negizinen iske asyrylyp jatqan jobalardy aıaqtaýǵa baǵyttalyp keldi. Vagondar men lokomotıvter parkin jańartý josparlary aıqyndaldy. Infraqurylymdy odan ári damytý qajet. Osy oraıda, júk aǵyndaryn Qazaqstan aýmaǵy arqyly qaıta baǵyttaýǵa múmkindik beretin halyqaralyq termınal jelisin keńeıtý kerek. Kólik mınıstrligi «Qazaqstan temir joly» kompanııasymen birlesip, 2027 jyldyń 1-shi shildesine deıin Astana qalasynda, sondaı-aq sheteldik Alıat, Svısloch jáne Selıatıno qalalarynda termınal jelisin júzege asyrýdy aıaqtaýǵa tıis. Budan bólek Býdapesht, Chendý jáne Konstantsa qalalarynda iske asyrýǵa kirisý qajet. Bul jobalar elimizdiń tranzıttik áleýetin arttyrýǵa yqpal etedi, - dedi O.Bektenov.
Sonymen qatar Úkimet basshysy jolaýshylar tarapynan vagondardyń jaı-kúıine qatysty shaǵymdar túsip jatqanyn aıtty.
- Stadler kompanııasynyń jańa vagondaryn jetkizýdi budan ári keshiktirýge bolmaıdy. Ónerkásip mınıstrligi «Qazaqstan temir joly» jáne Stadler kompanııalarymen birge tehnıkalyq qaýipsizdik talaptaryn saqtaı otyryp, jolaýshylar vagondaryn barynsha qysqa merzimde jetkizýi qajet. Osy jyldyń sońyna deıin jańa 215 lokomotıv pen 1,5 myńǵa jýyq júk vagony men jolaýshylar vagondary temirjol jelisine shyǵýǵa tıis. Sondaı-aq bıylǵy 1-shi qyrkúıekke deıin otandyq óndiristiń 13 myń júk vagony men 500 jolaýshylar vagonyn satyp alý boıynsha bes jyldyq baǵdarlamany bekitken jón, - dedi Premer-mınıstr.
Álemniń kóptegen elderi, sonyń ishinde Qytaı, Japonııa, Eýropalyq Odaq kólik salasynda tsıfrlyq sheshimder men jasandy ıntellektini engizý boıynsha belsendi jumys júrgizip keledi.
Olar poıyzdardyń qozǵalys kestesin ońtaılandyrýǵa, bos turyp qalý ýaqytyn qysqartýǵa, ótkizý qabiletin jáne jelini kútip-ustaý sapasyn arttyrýǵa múmkindik beredi.
Buǵan deıin elimizdiń barlyq óńirindegi 124 vokzal jóndelip jatqanyn jazǵan edik.
