Premer-mınıstr vedomstvolarǵa derbes derekterdi qorǵaýǵa qatysty tapsyrma berdi
ASTANA. KAZINFORM — Ekonomıkalyq úderisterdiń damýyn boljaý úshin jasandy ıntellektini qoldanýdyń naqty tetigin engizýi qajet. Bul týraly Úkimet otyrysynda Premer-mınıstr Oljas Bektenov málim etti.
— Qazirgi syn-qaterler áleýmettik-ekonomıkalyq damý barysyn josparlaýdyń neǵurlym naqty quraldaryna kóshýdi talap etedi. Jasandy ıntellekt úlken derekterdi óńdeýge, zańdylyqtardy anyqtaýǵa jáne barynsha naqty boljamdar jasaýǵa múmkindik beredi, ıaǵnı memlekettik ekonomıkalyq saıasattyń tıimdiligin arttyrady. Osyǵan baılanysty Ulttyq ekonomıka mınıstrligi Jasandy ıntellekt mınıstrligimen birlesip, ekonomıkalyq úderisterdiń damýyn boljaý úshin jasandy ıntellektini qoldanýdyń naqty tetigin engizýi qajet, — dedi Oljas Bektenov.
Onyń aıtýynsha, kásiporyndardyń kópshiligine, ásirese shaǵyn jáne orta bıznes úshin jasandy ıntellekt kúrdeli ári qol jetkize almaıtyn qural bolyp otyr. Munyń negizgi sebepteri — quzyretterdiń, resýrstar men naqty iske asyrý tetikteriniń jetispeýshiligi.
— Sondyqtan Jasandy ıntellekt mınıstrligi múddeli memlekettik organdarmen birlesip, shaǵyn jáne orta bıznes salasynda jasandy ıntellektini engizýdi yntalandyrý tásilderin ázirleýi qajet. Ǵylym jáne joǵary bilim mınıstrligi osy baǵytta jańa mamandardy daıarlaýmen qatar, ártúrli salada eńbek etip júrgen kadrlardy qaıta daıarlap, atalǵan máselege basa mán berýge tıis, — dedi Premer-mınıstr.
Sonymen qatar Úkimet basshysy jańa Konstıtýtsııada alǵash ret azamattardyń derbes derekterin qorǵaý quqyǵy bekitilgenin eske saldy. Bul salanyń odan ári damýyna serpin berip, memlekettiń strategııalyq basymdyqtaryn aıqyndaıdy. Qazir zańnamada jasandy ıntellekt júıelerin paıdalaný kezinde derbes derekterdi qorǵaý qajettiligi kózdelgen.
— Jasandy ıntellekt mınıstrligine úshinshi taraptar men júıelerdiń derbes derekterge ruqsatsyz kirýine jol bermeý, sondaı-aq zııatkerlik menshik nysandaryna quqyqtardy qorǵaý maqsatynda tıisti baqylaýdy qamtamasyz etýdi tapsyramyn. Qorytyndylaı kele, «Digital Qazaqstan» strategııasynyń jobasy elimizde túbegeıli tsıfrlyq ózgeristerdi qamtamasyz etip, ekonomıka salalarynda jasandy ıntellektini engizýge baǵyttalǵanyn atap ótemin. Sondyqtan onyń jedel kelisilip, ári qaraı sapaly iske asyrylýyn qamtamasyz etý mańyzdy, — dedi Oljas Bektenov.
Budan buryn habarlanǵandaı, byltyr IT-qyzmetter eksporty 1 mlrd dollardan asty.
