Premer-mınıstr: úsh JEO qurylysyn josparlanǵan merzimde aıaqtaımyz

ASTANA. KAZINFORM — Bıyl 2,6 GVt dástúrli jáne jańartylatyn energııa kózderi iske qosylady. Bul týraly Úkimettiń keńeıtilgen otyrysynda Premer-mınıstr Oljas Bektenov málim etti.

— Ózderińiz biletindeı, elimizde elektr energııasynyń tapshylyǵy saqtalýda. Ony eń joǵary júkteme kezeńderinde ımporttyń esebinen jaýyp otyrmyz. Byltyr tapshylyq 29%-ǵa azaıǵanymen, aýqymy áli de úlken. Bıyl 2,6 GVt dástúrli jáne jańartylatyn energııa kózderi iske qosylady. Bul kelesi jyldyń birinshi toqsanynda energııa tapshylyǵy máselesin sheshýge múmkindik beredi, — dedi O. Bektenov.

Onyń aıtýynsha, jańa tarıf saıasatynyń nátıjesinde rettelip kórsetiletin qyzmetterdegi ádil naryqtyq jaǵdaılar qalpyna kelip jatyr. Qazirgi ýaqytta boljamdy tarıfter TKSh salasyna jeke ınvestıtsııalardy qaıta tartýǵa jol ashty. Mysaly, ótken jyly energetıka salasyna 655 mlrd teńge ınvestıtsııa tartylsa, bıyl bul kórsetkish shamamen 900 mlrd teńge deńgeıinde bolady dep kútilip otyr.

— Jalpy alǵanda, 2029 jylǵa qaraı elektr energııasyn óndirý kólemi 39 mlrd kılovatt-saǵatqa ulǵaıady. Kókshetaýda Jylý elektr stantsııasynyń qurylysy bastaldy, Semeı jáne Óskemen qalalarynda JEO-nyń jobalary boıynsha merdiger uıymdar men qarjylandyrý kózderi anyqtaldy. Úsh JEO qurylysyn josparlanǵan merzimde aıaqtaımyz, — dedi Úkimet basshysy.

Budan buryn Oljas Bektenov 200-den astam jańa óndiris ornynyń qurylysy aıaqtalýǵa jaqyn ekenin aıtty.