Premer-mınıstr úsh mınıstrlikke gaz ballondarynyń óndirisin uıymdastyrýdy tapsyrdy
ASTANA. KAZINFORM — Úkimet otyrysynda Energetıka mınıstrligine gaz ballondarynyń aınalymyn baqylaýdyń naqty tetigin ázirleýdi tapsyryldy.
— Turmystyq órtpen qatar gaz ballondarynyń jarylý jaǵdaılary da tirkelýde. Byltyr osyndaı 70-ten astam oqıǵa oryn alyp, shashamen 90 adam zardap shekti. Jarylystardyń negizgi sebebi — ballondardy paıdalaný kezinde qaýipsizdik talaptarynyń buzylýy. Budan bólek, 350 myńǵa jýyq turmystyq gaz ballony 40-50 jyl boıy paıdalanylyp keledi, bulardy dereý aýystyrý qajet. Osy kúnge deıin paıdalaný merzimi ótip ketken turmystyq ballondardy alyp qoıý jáne kádege jaratý tártibi ázirlenbegen. Energetıka mınıstrligine múddeli memlekettik organdarmen birge gaz ballondarynyń aınalymyn baqylaýdyń naqty tetigin ázirleýdi tapsyramyn, — dedi Premer-mınıstr Oljas Bektenov.
Sondaı-aq, ol gaz ballondaryn óndirý máselesi de uzaq ýaqyt boıy sheshimin tappaı kele jatqanyn atap ótti.
— Bul másele jyl saıyn kóteriledi. Ónerkásip, Ulttyq ekonomıka jáne Ekologııa mınıstrlikterine osy jyldyń sońyna deıin Qazaqstanda ballon shyǵarý máselesin sheshýdi tapsyramyn, — dedi Úkimet basshysy.
Aıta ketý kerek, Úkimettiń búgingi otyrysynda jylytý maýsymyndaǵy órt qaýipsizdigi sharalary pysyqtalyp jatyr.
