Premer-mınıstr túrli salalardaǵy negizgi kórsetkishterdi málim etti

ASTANA. KAZINFORM — Búgin byltyrǵy jyldyń qorytyndysyna arnalǵan Úkimettiń keńeıtilgen otyrysynda Premer-mınıstr Oljas Bektenov statıstıkalyq ósý kórsetkishteriniń naqty nátıjelerin baıandady.

- 29 iri zaýyt salyndy. Olardyń qatarynda Qostanaı oblysynda shoıyn quıý, Almaty oblysynda volfram jáne jylý oqshaýlaǵysh materıaldar óndiretin, Shymkentte baǵaly metaldardy óńdeý, Qaraǵandy oblysynda katodty mys, avtomobıl shınalary men turmystyq tehnıka shyǵaratyn jáne basqa da kásiporyndardy atap kórsetýge bolady. Saran qalasynda zamanaýı óndiristerdiń iske qosylýy oǵan monoqalalar sanatynan shyǵýǵa múmkindik berdi, - dedi O. Bektenov.

Onyń aıtýynsha, byltyr 26 mln tonnadan astam astyq, 3 mln tonnadan astam maıly daqyldar jınaldy, 4 mln tonna astyq eksportqa jóneltildi.

- Alǵash ret elimizde 19 mln sharshy metr turǵyn úı salyndy. 397 densaýlyq saqtaý, 298 bilim berý nysany boı kóterdi. 11 myń orynǵa arnalǵan 40 stýdenttik jataqhana paıdalanýǵa berildi. Júk tasymalynyń kólemi ótken jyly 10%-ǵa ósip, shamamen 1 mlrd tonnaǵa jetti. Transkaspıı halyqaralyq kólik baǵyty boıynsha konteınerlik tasymaldaý 2,7 esege ulǵaıdy. Qurylys jáne jóndeý jumystarymen 12 myń shaqyrym avtomobıl joldary jáne 2 myń 800 shaqyrym temirjol qamtyldy. Almaty, Qyzylorda jáne Shymkent áýejaılarynda úsh jańa termınal paıdalanýǵa berildi, - dedi Úkimet basshysy.

Onyń sózine qaraǵanda, qosymsha 300 myńnan astam adam gazben qamtylyp, 200 myńnan astam adam ortalyqtan beriletin sý júıesine qosyldy. 542 shaqyrym jylý jelileri men 55 jylý kózi jańǵyrtylyp, 6,5 myń shaqyrym ınjenerlik jeliler jóndeldi.

Budan bólek, jalpy qýaty 700 MVt-tan asatyn qosymsha elektr qýatyn óndirý kózderi iske qosyldy.

- Eginshiler sýarmaly sýmen tolyq kólemde qamtamasyz etildi. Aral teńizine 2 mlrd 600 mln. tekshe metr sý jiberildi. Bul ortasha jyldyq kórsetkishten edáýir joǵary. Jalpy uzyndyǵy 400 shaqyrymnan asatyn 80 sý arnasyn jańǵyrtý jumystary aıaqtaldy. Sý únemdeý tehnologııalarymen qamtylǵan egis alqaby 1,5 esege artyp, 470 myń gektarǵa deıin jetkizildi, - dedi O. Bektenov.

Munymen qosa, ınvestıtsııalyq shtabta jalpy quny 50 mlrd dollar bolatyn 115 joba boıynsha problemalyq máseleler tez arada sheshimin tapty.

- Aıta ketý kerek, Investıtsııalyq shtab istiń múddesin nazarǵa alyp, bıýrokratııalyq máselelerge qaramastan, elge qajetti jobalardy der kezinde bastaýǵa múmkindik beretin sheshimderdi qabyldaýda. Ári qaraı ol iskerlik ahýaldy jaqsartý úshin naqty problemalyq keıster negizinde zańnamalyq ózgeristerdi ázirleıdi. Qazirgi tańda 97 túzetý boıynsha osyndaı jumys júrip jatyr, - dedi ol.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.