Premer-mınıstr turǵyn úıdiń bastapqy jarnasyn tómendetý tetikterin ázirleýdi tapsyrdy
ASTANA. KAZINFORM – Azamattar úshin turǵyn úı baǵdarlamalarynyń qoljetimdiligin arttyrý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Taǵy bir mańyzdy másele – qoldanystaǵy óndiristik qýattardy tolyq júkteý jáne jańa jobalardy ýaqtyly iske qosý. Kólik mınıstrligi «Qazaqstan temir joly» kompanııasymen birge óńdeý kásiporyndarynyń jumysyna qajetti shıkizat pen qosalqy bólshekter tıelgen konteınerlerdiń jáne vagondardyń úzdiksiz jetkizilýin qamtamasyz etsin. Ózderińizge málim, geologııalyq zertteý jumystaryn jedeldetý jáne perspektıvaly jańa ken oryndaryn anyqtaý shıkizat bazasyn keńeıte túsýge tikeleı yqpal etedi, - dedi Premer-mınıstr.
Osy rette Úkimet basshysy Ónerkásip mınıstrligine jyl sońyna deıin geologııalyq zertteý jumystarynyń negizgi kezeńderin aıaqtap, naqty nátıjelerdi usynýdy tapsyrdy.
- Sondaı-aq josparlanǵan 20,4 mln sharshy metr turǵyn úıdi naqty paıdalanýǵa berý qurylys sektoryndaǵy basym mindet bolyp qala beredi. Bul rette turǵyn úıler qajetti ınfraqurylymmen jáne abattandyrýmen qamtamasyz etilip, qonystanýǵa tolyq daıyn bolýǵa tıis. Óńir ákimdikteri jer telimderin aldyn ala ázirlep, ınjenerlik ınfraqurylym tartý jumystaryn tezdetýi kerek. Sondaı-aq turǵyn úıdi qarjylandyrý tetikterin jetildirip, azamattar úshin turǵyn úı baǵdarlamalarynyń qoljetimdiligin arttyrý qajet. Qarjy naryǵyn retteý jáne damytý agenttigi Ónerkásip mınıstrligimen birlesip, bastapqy jarna mólsherin tómendetý tetikterin engizýge qatysty qosymsha usynystar ázirlesin, - dedi Oljas Bektenov.
Buǵan deıin Premer-mınıstr Úkimettiń basty mindeti ınflıatsııany 10%-dan tómen deńgeıde ustap turý ekenin aıtqan bolatyn.
