Premer-Mınıstr: Tsıfrlandyrý jumysshylarǵa jańa múmkindikter beredi

ASTANA. KAZINFORM – AMANAT partııasy fraktsııasynyń keńeıtilgen otyrysynda Premer-Mınıstr Oljas Bektenov ónerkásip pen aýyl sharýashylyǵyn tsıfrlandyrý, bilim berý ınfraqurylymyn damytý jáne Jumysshy mamandyqtary jyly aıasyndaǵy mindetterdiń oryndalýy týraly baıandady, dep habarlaıdy agenttik tilshisi.

Úkimet basshysy ónerkásip salasyna zamanaýı tehnologııalar men tsıfrlyq sheshimderdi engizý Memleket basshysy qoıǵan tapsyrmalarǵa sáıkes júzege asyrylyp jatqanyn atap ótti. «Qarmet» AQ kompanııasynda shahtalar men baıytý fabrıkalaryn úılestirýdiń tsıfrlyq júıesi engizildi, gaz jaǵdaıyna táýlik boıy baqylaý men jumysshylardyń ornalasqan jerin qadaǵalaý múmkindigi jasalǵan. «Sokolov-Sarybaı taý-ken baıytý óndiristik birlestiginde» SafeStart jobasy engizilip, jaraqattaný deńgeıi 30 paıyzǵa tómendedi. ERG kompanııasynyń «Vostochnyı» kenishinde júkti ózi túsiretin robottandyrylǵan tehnıka paıdalanylýda. «Qazaqmys» kásiporyndarynda jerasty symsyz radıobaılanys júıesi iske qosyldy.

Oljas Bektenov tsıfrlandyrý jumys oryndaryn qysqartpaıtynyn, qyzmetkerlerdi qaıta oqytý arqyly jańa baǵyttarǵa beıimdeıtinin atap ótti. Bul Jumysshy mamandyqtary jyly aıasyndaǵy Prezıdent tapsyrmalarymen úndes.

Premer-Mınıstr aýyl sharýashylyǵy Memleket basshysynyń erekshe nazarynda ekenin aıtty. Kóktemgi dala jumystaryna qarjylandyrý kólemin eki ese ulǵaıtýdyń arqasynda sharýalar naýqandy sátti aıaqtady. 15 óńirde egin oraǵy júrip jatyr, qazirgi tańda 6 mln tonnadan astam astyq bastyryldy, bul jalpy kólemniń shamamen 30 paıyzy. Kókónisterdiń de ónimdiligi joǵary. Jańa ónimdi saqtaý úshin qoımalar jetkilikti.

Qazaqstan aýyl sharýashylyǵy ónimderin álemniń 80 eline eksporttaıdy, onyń 52 paıyzdan astamy qosylǵan quny joǵary ónimder. Ónimdilikti arttyrý úshin agrotehnologııalar engizilýde: tyńaıtqysh qoldaný kólemi eki esege artty, aýyl sharýashylyǵy tehnıkasyn jańartý jumystary kúsheıtildi. Otandyq tehnıka óndirýshilerdi qoldaý baǵdarlamasy arqyly 160 mlrd teńgeden astam somaǵa 7 myńǵa jýyq tehnıka lızıngke berildi.

Mal sharýashylyǵynda da ilgerileý bar: 3,5 myńnan astam qazaqstandyq kásiporyn sheteldik ımporttaýshylardyń tizilimine engizildi. Birqatar óńirde aýyl sharýashylyǵy ónimderin tereń óńdeý jobalary iske asyrylyp jatyr. Soltústik Qazaqstanda bıdaıdan glıýten men bıootyn, Almaty oblysynda júgeriden krahmal óndiriledi. Qostanaı, Túrkistan, Jambyl oblystarynda jáne Astana qalasynda lızın, glıýten, bıoetanol, glıýkoza-frýktoza shárbaty shyǵaratyn jańa óndirister iske qosylady.

«Barlyq áleýmettik mindettemeler tolyq oryndalýda. Kelesi jyly áleýmettik shyǵystardyń qurylymyn ońtaılandyrý júrgiziledi. Qarajatty ádil bólý úshin memlekettik qoldaý sharalarynyń biryńǵaı tsıfrlyq platformasy ázirlendi. Maqsat – tabysy joǵary otbasylarǵa kórsetiletin kómekti toqtatyp, qarajatty shynymen muqtaj jandarǵa baǵyttaý», – dedi Premer-Mınıstr.

Bul úshin skorıng júıesi synaqtan ótkizilýde: Shymkent qalasy men Qaraǵandy oblysynda pılottyq joba iske qosyldy. Keıin júıe barlyq óńirge taratylatyn bolady.

Oljas Bektenov bilim berý salasynda «Keleshek mektepteri» ulttyq jobasy qarqyndy júrip jatqanyn atap ótti. 2024–2025 jyldary 484 myń orynǵa arnalǵan 340 mektep salyndy. Jyl sońyna deıin taǵy 111 mektep iske qosylady. 245 mektepte keshendi jańǵyrtý júrgiziledi.

Kásiptik-tehnıkalyq bilimge erekshe kóńil bólinip otyr: bıyl kolledjderdiń 150 myń stýdenti memlekettik tapsyryspen qamtyldy. 9-synyp túlekteriniń 100 paıyzy tegin kásiptik-tehnıkalyq bilim alýda. Jumysshy mamandyqtary jyly aıasynda kásiporyndar suranysy boıynsha oqıtyn stýdentter sany úsh ese kóbeıip, 30 myńǵa jetti.

Tehnıkalyq jáne kásiptik bilim berýde jan basyna shaqqandaǵy normatıvtik qarjylandyrý eki eseden astam ósti – 437 myńnan 913 myń teńgege deıin. Joǵary bilim berý júıesinde bıyl 93 myń grant bólindi.

Stýdentterdiń turmystyq jaǵdaıyn jaqsartý maqsatynda jyl basynan beri 3,5 myń oryndyq 4 jataqhana ashyldy, jyl sońyna deıin taǵy 10 myń orynǵa arnalǵan 29 jataqhana paıdalanýǵa beriledi. Sońǵy bes jylda jataqhanadaǵy oryn tapshylyǵy úsh esege qysqaryp, 61 myńnan 17 myń orynǵa deıin azaıdy.

Aıta keteıik, tsıfrlandyrýdyń arqasynda kóleńkeli ekonomıkadan 28 mlrd teńgeden astam qarjy qaıtaryldy.