Premer-mınıstr: Tasqyn kezeńiniń bastalýyna kóp qalǵan joq

ASTANA. KAZINFORM — Premer-mınıstr Oljas Bektenov Úkimet otyrysynda memlekettik organdarǵa tasqynǵa daıyndyqty kúsheıtýdi tapsyrdy.

— Sý tasqyny kezeńiniń bastalýyna da kóp ýaqyt qalǵan joq. Ákimder bul máseleni erekshe baqylaýǵa alýy qajet. Tótenshe jaǵdaı týraly halyqty habardar etetin barlyq júıelerdiń turaqty jumysyn qamtamasyz etińizder, — dedi ol.

Úkimet basshysy áleýmettik jeliler men BAQ-ta túsindirý jumystaryn kúsheıtý mańyzdy ekenine de toqtaldy.

— Tótenshe jaǵdaılar mınıstrligi sý tasqynyna tolyǵymen daıyn bolýǵa tıis. Sondaı-aq, ortalyq jáne jergilikti memlekettik organdardyń jumysyn uıymdastyrsyn, — dedi Oljas Bektenov.

Osyǵan deıin sý tasqynynyń saldaryn joıý úshin 10 000-ǵa jýyq áskerı qyzmetshi jumyldyrylýy múmkin ekeni aıtyldy.

Sonymen qatar, Tótenshe jaǵdaılar mınıstri sý tasqynyna daıyndyqty jedel aıaqtaýdy tapsyrǵanyn jazǵan edik.