Premer-mınıstr Talapker aýylyn sýmen qamtamasyz etý týraly: Bólingen aqsha ıgerilmeı, keri qaıtaryldy

ASTANA. KAZINFORM – Úkimet otyrysynda Premer-mınıstr Oljas Bektenov Aqmola oblysyndaǵy Talapker jáne Qajymuqan aýyldaryn sýmen qamtamasyz etý jobasy sozbalańǵa salynyp ketkenin synady.

«Keıbir toptyq sý qubyrlaryn salý jobalary jyldar boıy iske asyrylyp kele jatqanyn jaqsy bilemiz. Keı jerlerde aýyl ishindegi jeliler daıyn bolǵanmen, qajetti sý kózi joq. Mysaly, Aqmola oblysynyń Talapker jáne Qajymuqan aýyldarynda osyndaı jaǵdaı qalyptasyp otyr. ıAǵnı, aýyl ishinde jeliler tartylǵan, al Kenjebaı jáne Raqymjansaı toptyq sý qubyryn salý jobasy áli iske asyrý satysynda», - dedi Úkimet basshysy.

Onyń sózinshe, atalǵan jobaǵa bólingen qarajattyń basym bóligi bıýdjetke qaıtarylǵan.

«Jumys kestesiniń saqtalmaýyna baılanysty byltyr bólingen 760 mln teńgeniń 500 mln teńgeden astamy bıýdjetke qaıtaryldy. Bul rette, sýdy jibergen kezde olardyń ishki jelileri qandaı kúıde bolady degen oryndy suraq týyndaıdy. Bolmasa jóndeý júrgizip, qosymsha shyǵystar talap etiledi. Bul – durys josparlamaýdyń saldary. Aqmola oblysynyń ákimine atalǵan máseleni erekshe baqylaýǵa alýdy tapsyramyn. Mundaı jaǵdaılarǵa jol bermeý úshin Ónerkásip jáne Sý resýrstary mınıstrlikteri jobalardyń iske asyrylý barysyn apta saıyn baqylap, buzýshylyqtar anyqtalǵan jaǵdaıda maǵan tikeleı baıandaýlary qajet, - dedi Oljas Bektenov.