Premer-mınıstr Soltústik Qazaqstandaǵy qorǵanys bógetteriniń jaǵdaıymen tanysty
PETROPAVL. KAZINFORM – Oljas Bektenov SQO-da sý tasqynyna qarsy is-sharalardyń júzege asyrylýyn jáne oblystyq aýrýhananyń qurylysyn tekserdi. Bul týraly Úkimettiń baspasóz qyzmeti habarlady.
Oljas Bektenov SQO-da sý tasqynyna qarsy is-sharalardyń júzege asyrylýyn jáne oblystyq aýrýhananyń qurylysyn tekserdi
Premer-mınıstr Oljas Bektenov Soltústik Qazaqstan oblysyna jumys sapary aıasynda áleýmettik mańyzdy ınfraqurylymdar qurylysynyń barysymen tanysty. Olar – Prıbrejnoe aýylyndaǵy jol ótkeli jáne eldi mekender boıyndaǵy qorǵanys bógetteri, sondaı-aq Petropavldaǵy kópsalaly oblystyq aýrýhana.
Soltústik Qazaqstan oblysy ákiminiń birinshi orynbasary Marat Tasmaǵanbetov qorǵanys bógetterin qaıta jańartý boıynsha júrgizilip jatqan jumystar týraly baıandady. Sońǵy eki jylda óńirde alty negizgi gıdrotehnıkalyq qurylysty qaıta jańartý boıynsha sý tasqynyna qarsy is-sharalar kesheni júzege asyrylǵan. Qazirgi zamanǵy ınjenerlik parametrlerge tolyq sáıkes keletin 24 shaqyrymnan astam qorǵanys jelileri salynyp, qaıta jańartylǵan. Osy maqsattarǵa baǵyttalǵan qarajattyń jalpy kólemi 14 mlrd teńgeni qurady. Bul halyqtyń qaýipsizdik deńgeıin edáýir arttyrýǵa, Petropavl men Qyzyljar aýdanyndaǵy turǵyn úılerdi, áleýmettik ınfraqurylymdy jáne tirshilikti qamtamasyz etý júıelerin qorǵaýǵa múmkindik berdi.
Máselen, Qyzyljar aýdanyndaǵy Prıbrejnoe aýylyndaǵy uzyndyǵy 5 shaqyrymnan asatyn, Teplıchnoedaǵy 4,6 shaqyrym, Beskóldegi 5,9 shaqyrym qorǵanys bógetteri qaıta jańartyldy. Bul qurylystardyń ortasha bıiktigi irgesinen sanaǵanda 7,2-7,5 metrge deıin kóterildi, bul Baltyq júıesi boıynsha 102 metrlik eseptik deńgeıge sáıkes keledi. Petropavl qalasynda osyndaı nyǵaıtý jumystary Podgora shaǵyn aýdany Ýşeva kóshesindegi uzyndyǵy 1,3 shaqyrym jáne Hromzavod aýdanyndaǵy Kojevennyı kentindegi uzyndyǵy 4,1 shaqyrym bolatyn bógetterde júrgizildi. Negizgi nazar oblys ortalyǵyndaǵy 1953 jyly salynǵan «Bıoprýd» nysanyna aýdaryldy. Munda 2024-2025 jyldary júrgizilgen jumystar esebinen uzyndyǵy 3,4 shaqyrymdyq qorshaý bógeti 5 metr bıiktikke kóterildi, al beton qorshaýlar kúrdeli jóndeýden ótkizildi, bul tasqyn sýdan tónetin qaýipti tómendetip otyr.
Qazirgi ýaqytta nysandarda ishki betkeılerdi kópjyldyq shópter egilgen geo-torshamen abattandyrý jáne bóget jotalarynyń qıyrshyq tas jabynyn tóseý boıynsha josparly jumystar jalǵasýda.
Soltústik Qazaqstan oblysynyń Jolaýshylar kóligi jáne avtomobıl joldary basqarmasynyń basshysy Erden Shortybaev Premer-mınıstrge Prıbrejnoe aýylyndaǵy jol ótkeli ornatylǵan «Voronıı ostrovqa kireberis» oblystyq mańyzy bar avtomobıl jolyn qaıta jańartý jobasynyń júzege asyrylý barysy týraly baıandady. Jobada úıindi kóterip, ony normatıvtik tehnıkalyq parametrlerge keltire otyryp, avtomobıl jolyn rekonstrýktsııalaý, sondaı-aq uzyndyǵy 72 metr bolatyn eń úsh aralyqty jol ótpesiniń qurylysy kózdelgen, jalpy quny 4,4 mlrd teńge.
Jańa kólik ınfraqurylymy shamamen 1,5 myń adam turatyn Prıbrejnoe aýylynyń qorǵanys bógetimen biriktiriletin bolady. Bul eldi mekenmen jyl boıy úzdiksiz qatynasty qamtamasyz etýge múmkindik beredi. Voronıı ostrovta týrıstik nysandar ǵana emes, sonymen qatar Petropavl qalasynyń turǵyndaryn aýyz sýmen qamtamasyz etetin strategııalyq mańyzdy birinshi kóterý sorǵy stansasy da ornalasqan. Buryn sý tasqyny kezeńinde aýylǵa baratyn jol tolyqtaı sý astynda qalyp, adamdardy tasymaldaý jáne evakýatsııalaý tek sý kóligimen júzege asyrylatyn, bul qolaısyz aýa raıy jaǵdaıynda azamattardyń qaýipsizdigine qaýip tóndirdi.
Búgingi tańda nysanda irgetasty qıyrshyq taspen ornyqtyrý, 40 burǵylaý arqyly 40 qadany ornatý, tórt rostverk salý jumystary aıaqtaldy, sondaı-aq shetki tirekter turǵyzyldy. Qazirgi ýaqytta №2 tirektiń rıgelin ornatý jáne jer tósemin tóseý jumystary júrgizilýde. Bıyl bul jobany júzege asyrýǵa 2,6 mlrd teńge bólindi. Jol ótkeliniń qurylysyn aıaqtap, ony paıdalanýǵa berý 2027 jyldyń qazan aıyna josparlanyp otyr.
Nysandardy aralaý qorytyndysy boıynsha Oljas Bektenov gıdrotehnıkalyq qurylystardy nyǵaıtý boıynsha barlyq jumystardy ýaqtyly aıaqtaý qajettigin, sondaı-aq olardy ári qaraı kútip ustaý jáne tehnıkalyq qyzmet kórsetý boıynsha júıeli sharalar qabyldaý kerektigin atap ótti. Sondaı-aq Premer-mınıstr óńir basshylyǵynyń nazaryn Prıbrejnoe turǵyndary úshin osy kólik nysanynyń áleýmettik mańyzdylyǵyna aýdaryp, jobany júzege asyrý merzimderiniń qatań saqtalýyn qamtamasyz etýdi tapsyrdy.
Premer-mınıstr Petropavl qalasynda kópsalaly oblystyq aýrýhanasynyń qurylys barysymen tanysty. YDA Holding dırektorlar keńesiniń tóraǵasy Hýseın Arslan medıtsınalyq keshenniń jalpy aýmaǵy 92 myń sharshy metrden asatynyn málimdedi. Zamanaýı medıtsınalyq keshen quramyna bir aýysymda 480 qabyldaýǵa arnalǵan konsýltatsııalyq-dıagnostıkalyq korpýs, táýlik boıy jáne kúndizgi statsıonarlar, bosaný bólimi, sáýlelik dıagnostıka, radıologııa bólimsheleri, klınıkalyq-dıagnostıkalyq zerthana jáne basqa da mamandandyrylǵan bólimsheler kiredi. Munda kardıohırýrgııa, neırohırýrgııa, onkologııa, tamyr hırýrgııasy, travmatologııa jáne basqa da baǵyttar boıynsha joǵary tehnologııaly medıtsınalyq kómek kórsetiletin bolady. Qazirgi ýaqytta temirbeton konstrýktsııalaryn turǵyzý jumystary aıaqtaldy, qabyrǵalardyń kirpish qalaý jumystary, qasbet profılderin montajdaý jáne ishki árleý jumystary jalǵasýda. Qarjylandyrýǵa qatysty qajetti máseleler rettelip, qurylys jumystary bekitilgen kestege sáıkes júrgizilip jatqany atap ótildi. Nysandy paıdalanýǵa berý 2027 jylǵa josparlanǵan.
Aıta ketelik Premer-mınıstr Oljas Bektenov Soltústik Qazaqstan oblysyna jumys sapary aıasynda Prezıdenttiń agroónerkásip keshenin damytý, aýyl sharýashylyǵynyń ónimdiligin arttyrý jáne otandyq ónimdi tereń óńdeý jónindegi tapsyrmalarynyń oryndalý barysyn teksergen edi.
