Premer-mınıstr sıyr etiniń baǵasyn Astananyń tájirıbesimen turaqtandyrýdy tapsyrdy
ASTANA. KAZINFORM – Premer-mınıstr Oljas Bektenov Úkimet otyrysynda ınflıatsııany aýyzdyqtaýǵa qatysty tapsyrma berdi.
- Sońǵy eki aıda ınflıatsııa deńgeıi 12,4%-ǵa deıin tómendedi. Alaıda keıbir óńirlerde, atap aıtqanda Ulytaý, Aqmola jáne Atyraý oblystarynda kerisinshe, óskeni baıqalady. Basty sebep – azyq-túlik baǵasynyń qymbattaýy, - dedi ol.
Premer-mınıstr oblys ákimderiniń qolynda azyq-túlik baǵasyn turaqtandyrýǵa qajetti quraldyń bári bar ekenin atap ótti.
- Saýda mınıstrligine áleýmettik mańyzy bar azyq-túlik taýarlarynyń tizbesin ýaqytsha keńeıtý jumysyn jedeldetýdi tapsyramyn. Bul qosymsha ónim túrleriniń baǵasyn retteýge múmkindik beredi. Sondaı-aq azyq-túlik ınflıatsııasynyń ósýine et jáne et ónimderi baǵasynyń úlesin eskere otyryp, Saýda, Aýyl sharýashylyǵy mınıstrlikteri men ákimdikter atalǵan ónimderdiń baǵasyn tejeýge erekshe nazar aýdarýy qajet.Sonymen qatar Astana qalasyndaǵydaı, arzandatylǵan sıyr etin iri saýda jelileri arqyly satý tájirıbesin búkil el aýmaǵynda keńinen qoldanǵan jón, - dedi Oljas Bektenov.
Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.