Premer-Mınıstr: Shaǵyn áýe kemelerin satyp alý mehanızmderin pysyqtaý qajet

ASTANA. KAZINFORM — «Qazaqstan temir joly» kórsetetin qyzmetterdiń tarıfteri qaıta qaralady. Bul týraly Úkimet otyrysynda Premer-Mınıstr Oljas Bektenov aıtty.

«Kólik-logıstıka sektorynyń máselelerine erekshe mán berý kerek. Kólik ınfraqurylymyn qoldaý jáne damytý aýqymdy ınvestıtsııa tartýdy talap etedi. Osyndaı sharalardyń biri – «Qazaqstan temir joly» kórsetetin qyzmetterdiń tarıfterin qaıta qaraý. Soǵan oraı, «Samuryq-Qazyna» qory Kólik mınıstrligimen birge júkterdi temirjol kóligimen tasymaldaýdyń jańa tarıftik saıasatyn ázirleýi qajet», - dedi Oljas Bektenov.

Premer-Mınıstr oblysaralyq jáne aýdanaralyq baǵyttardaǵy joldardy ortasha jóndeýmen barynsha qamtýǵa qatysty Kólik mınıstrligi naqty jobalardy, kórsetkishterdi jáne qarjylandyrý kózderin aıqyndap, 1 jeltoqsanǵa deıin naqty jospar ázirleýi tıistigin basa aıtty.

«Qarajattyń maqsatqa saı jumsalýyn baqylaýdyń bári jáne osy jumystardyń monıtorıngi Biryńǵaı tsıfrlyq platforma arqyly júrgizilýge tıis. Ónerkásip mınıstrligimen jáne Báıterek holdıngimen birge shaǵyn áýe kemelerin satyp alý mehanızmderin pysyqtaý qajet», - dedi Úkimet basshysy.