Premer-mınıstr Rıdder jylý elektr ortalyǵyndaǵy jóndeý jumystarymen tanysty
QR Premer-Mınıstri Álıhan Smaıylov Shyǵys Qazaqstan oblysyna jumys sapary aıasynda Rıdder qalasyndaǵy JEO jóndeý-qalpyna keltirý jumystarynyń barysymen tanysty, dep habarlaıdy QazAqparat Úkimettiń baspasóz qyzmetine silteme jasap.
Shyǵys Qazaqstan oblysy ákiminiń orynbasary Baqytjan Baıahmetovtiń aıtýynsha, búginde stansadaǵy 6 qazandyqtyń 2-ýi iske qosylǵan.
Jaqyn arada taǵy bireýi iske qosylyp, turǵyndar jylýmen tolyq qamtamasyz etiledi dep kútilýde.
Sonymen qatar qalǵan agregattar men qosalqy jabdyqtardy jóndeý-qalpyna keltirý jumystary júrgizilip jatyr.
Jalpy, búginde mazýt sorǵy stansasyn, otyn berý traktisin, týrbogenerator jáne baılanys transformatorlaryn jóndeý, jylý jelilerinde gıdravlıkalyq rejımdi qamtamasyz etý úshin sorǵy stantsııalaryn elektrmen jabdyqtaýdy qalpyna keltirý jumystary aıaqtaldy.
Qazandyq pen týrbınalyq tsehtardyń shatyry jóndeldi.
Kómir tasymaldanatyn temirjoldardy jóndeý jumystary da aıaqtalýǵa jaqyn.
Premer-Mınıstr ótken jylytý maýsymynda Rıdder JEO apatty jaǵdaıda jumys istep, jıi toqtap qalǵanyn, nátıjesinde turǵyndar qystyń kózi qyraýda jylýsyz qalǵanyn atap ótti.
«Buǵan burynǵy qojaıyndardyń stansany jańǵyrtý men jóndeý jumystaryna qarajat salmaǵany sebep boldy. Osynyń barlyǵy JEO-nyń ábden tozýyna ákep soqty. Respýblıkalyq bıýdjetten 8,4 mlrd teńge bólýge májbúr boldyq. Oblys ákimdigi óz tarapynan 500 mln teńgege jýyq qarjy bóldi. Osy ýaqytqa deıin jóndeý jumystary toqtaýsyz júrgizildi. Aldaǵy jylytý maýsymynyń durys ótýi úshin olardyń ýaqtyly aıaqtalýy mańyzdy. Muny kúni-túni qadaǵalap otyrýymyz kerek», — dedi Álıhan Smaıylov.
Ol sondaı-aq JEO-ny kommýnaldyq menshikke berý protsesin jedeldetýdi tapsyrdy.
Nysanda Premer-Mınıstrge aımaqtyń jylý berý maýsymyna daıyndyǵy týraly da baıandaldy.
Búgingi tańda bıýdjettik uıymdardy (830-dan astam nysan), turǵyn úılerdi (3 myńnan astam), ınjenerlik jeliler men qazandyqtardy daıyndaý jumystary aıaqtaldy.
JEO men sý elektr stansalarynda da osyǵan uqsas jaǵdaı, daıyndyq jumystary aıaqtalýǵa jaqyn.
