Premer-mınıstr: Rıdder, Kentaý, Ekibastuz energııa kózderin erekshe baqylaýǵa alý qajet
ASTANA. KAZINFORM — Búgin Úkimet otyrysynda Premer-mınıstr Oljas Bektenov jylý berý maýsymyna daıyndyq boıynsha mınıstrlikterge birqatar tapsyrma júktedi.
- Energetıkalyq kásiporyndarǵa ázirlik pasporttaryn berý jumystary bastalyp ketti. Osy rette, energııa kásiporyndarynyń jylý berý maýsymyna ázirligin baǵalaý komıssııasynyń jumysyna ákimder tikeleı ózderi qatysýy tıis. Nysandar qys merzimine ázirlik pasporttarynsyz jumysty bastamaýy kerek. Rıdder, Kentaý, Ekibastuz jáne Aqtaý qalalarynyń energııa kózderin erekshe baqylaýǵa alý qajet. Ázirlik pasporty bolmaı, jylytý maýsymy bastalatyn bolsa, kináliler jaýapqa tartylady, - O. Bektenov.
Sonymen qatar ol jylý berý maýsymyn ótkizý jónindegi óńirlik shtabtardyń jumysyn qaıta jańǵyrtýdy tapsyrdy. Energııa kózderi men jelilerdiń jumysyn únemi tekserip otyrý qajet.
- Jylytý maýsymyn aýa-raıyna qaraı qatań belgilengen merzimde bastap ketý kerek. Osyǵan baılanysty mynadaı tapsyrmalar beremin. Birinshiden, Energetıka mınıstrligi óńirlerdiń ákimdikterimen birge jylý kózderi men jylý jelilerinde jóndeý jumystarynyń ýaqtyly aıaqtalýyn qamtamasyz etsin. Bıylǵy 1 qyrkúıekke deıin óńirlerge beriletin áleýmettik mazýtty jetkizý kestesi bekitilsin. Ekinshiden, Energetıka mınıstrligi Qazaqstan temirjoly kompanııasymen jáne óńirlerdiń ákimdikterimen birge energııa obektilerine kómir men mazýtty bekitilgen keste men kólemderge sáıkes ýaqtyly jetkizý jóninde sharalar qabyldasyn. Sondaı-aq halyqtyń kómirmen qamtamasyz etilýine baqylaý belgilensin, - dedi Úkimet basshysy.
Premer-mınıstr Ónerkásip jáne qurylys mınıstrligine, óńirlerdiń ákimdikterine 1 qyrkúıekke deıin bilim berý obektileriniń tolyq ázirligin qamtamasyz etýdi tapsyrdy.
- Atalǵan mınıstrlik 15 qazanǵa deıin densaýlyq saqtaý, turǵyn úı-kommýnaldyq sharýashylyq jáne turǵyn úı qory obektileriniń ázirligin qamtamasyz etsin. Oqý-aǵartý, Ǵylym jáne Densaýlyq saqtaý mınıstrlikteri de bul máseleni baqylaýda ustaýy qajet, - dedi ol.
Budan buryn habarlanǵandaı, qazir jylý berý maýsymyna bilim berý nysandarynyń daıyndyǵy 92 paıyzdy qurap otyr.