Premer-mınıstr iri qalalardaǵy kólik keptelisi máselesin sheshýdi tapsyrdy
ASTANA. KAZINFORM — Kólik mınıstrligi ákimdiktermen birlesip iri qalalardaǵy kólik eń kóp júretin ýchaskelerde qozǵalys legin ıntellektýaldy basqarýdy pılottyq rejımde iske qosýy kerek. Bul týraly Úkimet otyrysynda Premer-mınıstri Oljas Bektenov málim etti.
- Ýrbanızatsııa úderisiniń qarqyn alýyna baılanysty kólik ınfraqurylymyna túsetin júkteme artyp keledi. Kólik mınıstrligi ulttyq aýqymdaǵy biryńǵaı tsıfrlyq kólik júıesin qalyptastyrýy qajet. Ol kólik aktıvterin tolyq esepke alyp, qozǵalysty naqty ýaqyt rejıminde basqarýǵa, júktemeni boljaýǵa jáne yqtımal táýekelderdi aldyn ala anyqtaýǵa múmkindik beredi, - dedi O.Bektenov.
Onyń aıtýynsha, iri qalalarda kólik keptelisteri kezinde ǵana áreket etpeı, salany júıeli basqarýǵa kóshý qajet. Bul azamattardyń júrip-turýyna, qalalyq ortanyń qaýipsizdigi men sapasyna tikeleı áserin tıgizedi.
- Kólik mınıstrligi ákimdiktermen birlesip, eki aı merzimde iri qalalardaǵy kólik eń kóp júretin ýchaskelerdi anyqtap, onda qozǵalys legin ıntellektýaldy basqarýdy pılottyq rejımde iske qossyn. Nátıjesi boıynsha eń tıimdi sheshimderdi keńinen taratý qajet. «Qazaqstan temir joly» kompanııasy bir aı merzimde tasymaldaý týraly derekterdi biryńǵaı derekter qoımasyna berýdi aıaqtasyn. Kólik mınıstrligimen birge kompanııany tsıfrlandyrýdy kezeń-kezeńimen damytý josparyn bekitip, tasymaldardy basqarýdyń otandyq tehnologııalaryna mindetti túrde kóshý qajet, - dedi Úkimet basshysy.
Aıta keteıik, 2029 jylǵa qaraı IT-eksportty keminde 2 mlrd AQSh dollaryna jetkizý josparlanǵan.
