Premer-mınıstr Petropavldaǵy sorǵy stantsııasyna bardy
PETROPAVL. KAZINFORM — QR Premer-mınıstri Oljas Bektenov Petropavl qalasyndaǵy jóndeý jumystary júrip jatqan sorǵy stantsııasynda boldy. KAZ Minerals Toby bul joba úshin 3,1 mıllıardtan asa qarjy bólgen bolatyn.
«Stonehenge construction» merdigerlik uıymynyń dırektory Álibek Serikov jóndeý jumystarynyń birinshi kezeńi aıaqtalǵanyn málimdedi.
— 30 qazanǵa deıin qurylys-montaj jumystary aıaqtaldy. Biz jalpy quny 2 mıllıard teńge shamasyndaǵy sheteldik qural-jabdyqtardy aldyrdyq. Qýatty sorǵylar sý basqan jaǵdaıda da jumys isteı beredi. Aqaýlardy anyqtaý jáne tehnologııalyq qurylǵylardy montajdaý júrip jatyr. Jumys belgilengen merzim — mamyrdyń aıaǵynda nemese odan erte aıaqtalady. Jobany eki kezeńge bóldik. Sý basqan jaǵdaıda da jumys toqtamaıdy, — deıdi Álibek Serikov.
Sorǵylardyń qýattylyǵy sekýndyna 1,5 tonna sýǵa teń. Olar qurǵaqta da, sýdyń astynda da birdeı jaqsy jumys isteıdi. Sonda da saqtyq úshin qurylǵy tórt metr bıiktikke kóterilgen.
Ótken kóktemdegi tasqynda qala úshin mańyzy zor bul nysan sý basqan aımaqta qalǵan edi. Sonyń saldarynan stantsııa apatty jaǵdaıda jumysyn toqtatyp, Petropavl birneshe kún sýsyz qaldy. Oryn alǵan másele týraly bilgen KAZ Minerals aldaǵy ýaqytta mundaı jaǵdaı qaıtalanbaý úshin stantsııany tehnologııalyq jabdyqtaýǵa kómek qolyn sozdy.
— KAZ Minerals Toby Soltústik Qazaqstan oblysyndaǵy byltyrǵy sý tasqynynyń saldaryn joıý jáne qalanyń ınfraqurylymyn jetildirýge arnalǵan bastamalardy qoldady. Atap aıtqanda, KAZ Minerals aımaqtaǵy strategııalyq mańyzdy nysan — sorǵy stantsııasynyń jóndeý jumysyna 3 mıllıard teńgeden asa qarjy jumsady. Sonymen qatar, bizdiń kompanııa baspanasyz qalǵan azamattarǵa páter satyp alý jáne jeke úı salýǵa da aqsha bóldi, — deıdi «KAZ Minerals Management» JShS ákimshiliginiń jetekshisi Ǵalym Amanjolov.
KAZ Minerals kompanııasynyń kómegimen sý tasqynynan zardap shekken otbasylarǵa 564 páter satyp alyndy. Top «Birlik» shaǵyn aýdanynda 80 turǵyn úıdiń qurylysy men 420 úıdiń ınjenerlik-kommýnıkatsııalyq ınfraqurylymyn (sý júıesi men kanalızatsııa) qarjylandyrdy. KAZ Minerals tek adamdardy ǵana emes, janýarlardy da qaraýsyz qaldyrǵan joq. Kompanııa sý tasqynynan aman qalyp, ýaqytsha turaqqa jetkizilgen úı janýarlaryna jem satyp alýǵa demeýshilik kómek kórsetti.
Osyǵan deıin Premer-mınıstr Soltústik Qazaqstan oblysyna jumys sapary barysynda sý tasqyny kezeńine daıyndyq máseleleri boıynsha respýblıkalyq keńes ótkizgenin jazdyq.