Premer-mınıstr ótkizý pýnktterindegi jumystyń baıaý júrip jatqanyn synǵa aldy
ASTANA. KAZINFORM — Premer-mınıstr Oljas Bektenov halyqaralyq avtokólik ótkizý pýnktterin rekonstrýktsııalaý jónindegi Memleket basshysy bergen tapsyrmalardyń oryndalý barysy boıynsha jıyn ótkizdi, dep habarlaıdy Úkimettiń baspasóz qyzmeti.
Onda kólik mınıstri Nurlan Saýranbaev, qarjy mınıstriniń mindetin atqarýshy Erjan Birjanov, QR Ulttyq qaýipsizdik komıteti tóraǵasynyń orynbasary — Shekara qyzmetiniń dırektory Erlan Aldajumanovtyń baıandamalary tyńdaldy.
Qarjy mınıstrliginiń málimetinshe, bıylǵy josparda Eýrazııalyq ekonomıkalyq odaqtyń syrtqy shekaralaryndaǵy (QHR, Ózbekstan Respýblıkasy, Túrikmenstan) 9 ótkizý pýnktin rekonstrýktsııalaý jumystary tur. Búgingi tańda olardyń 4-eýinde: Qaplanbek, Atameken, Qaljat jáne Alakól pýnktterinde jumystar aıaqtaldy. Bes nysandy jańǵyrtý jumystary jyl sońyna deıin óz máresine jetpek. «Jibek joly» jolaýshylar ótkizý pýnktin rekonstrýktsııalaý jospardan tys júrýde, aıaqtalýy 2026 jyldyń birinshi jartyjyldyǵynda kózdelip otyr.
Jańǵyrtý jumystary kezinde alty jolaqty kirme joldar, elektrondy qadaǵalaý júıelerimen qosa alǵanda, barlyq qyzmetter úshin biryńǵaı ınfraqurylym qurýdy kózdeıtin jaǵdaı jasaýǵa basa nazar aýdaryldy.
— Baıandamalardy tyńdaǵan Premer-mınıstr keden qyzmetiniń, sondaı-aq Reseı Federatsııasy men Qyrǵyzstan Respýblıkasy shekaralaryndaǵy avtomobıl ótkizý pýnktterin jóndeý merzimderiniń keshiktirilýine baılanysty salalyq mınıstrlikter jumysyn synǵa aldy. Oljas Bektenov QR Qarjy mınıstrligi Memlekettik kirister komıteti men QR Kólik mınıstrligi Avtomobıl joldary komıtetiniń tóraǵalaryn jumystaryn tıisti deńgeıde uıymdastyrmaǵany úshin jaýapkershilikke tartýdy tapsyrdy. Sonymen qatar mınıstrlikterdiń jaýapty basshylary jergilikti jerlerde jumysty úılestirý úshin óńirlerge jiberildi, — delingen habarlamada.
Keden qyzmetiniń kadr quramyna, ásirese ótkizý pýnktterine qatysty talaptardy qatańdatý, sondaı-aq jabdyqpen jaraqtandyrý jáne ınternet jelisine qoljetimdilikti qamtamasyz etý máseleleri boıynsha mindetter qoıyldy.
Kólik, qarjy mınıstrlerine ótkizý pýnktterin rekonstrýktsııalaý barysy týraly Premer-mınıstrge apta saıyn esep berý tapsyryldy.
Buǵan deıin Úkimet basshysy Oljas Bektenov taýar óndirý, satý jáne topqa bólý boıynsha quzyrly organdarǵa tapsyrma berdi.