Premer-mınıstr otandyq dári óndirýshilerge: Memleket baǵany qoldan ósirmeıtinderge ǵana qoldaý kórsetedi

ASTANA. KAZINFORM — Premer-mınıstr Oljas Bektenov Úkimet otyrysynda otandyq dári óndirýshilerge qaıyryldy. 

— Bıyl preparattarǵa baǵany tómendetýdiń arqasynda memleket dárilerdi satyp alýda 36 mlrd teńgeden astam qarjy únemdedi. Bul qarajat halyqty qosymsha dári-dármekpen qamtamasyz etýge baǵyttalady.

Satyp alý baǵalarynyń tómendeýi óndirýshiler men jetkizýshilerge unaı bermeıtini túsinikti. Biraq biz azamattarymyzdyń múddelerin basshylyqqa alýymyz kerek, — dedi ol.

Úkimet basshysy dáriler ádil baǵamen satyp alynatynyn eskertti.

— Otandyq farmatsevtıkalyq óndirýshilerge aıtarym, biz sizderdi ári qaraı da qoldaımyz. Oǵan eshqandaı kúmán bolmasyn.

Biraq memlekettik qoldaý sharalary sapaly medıtsınalyq ónimdi jetkizetin jáne baǵany jasandy túrde ósirmeıtin naryqtyń adal qatysýshylaryna ǵana kórsetiledi, — dedi Premer-mınıstr.

Buǵan deıin birqatar onkologııalyq preparattyń quny 40%-dan astam tómendegenin jazǵan edik.