Premer-Mınıstr otandyq bankterdi maqtady: Salyq tóleýde jaqsy sheshimder bar

ASTANA. KAZINFORM – QR Premer-Mınıstri Oljas Bektenov memleket pen bank sektorynyń ózara is-qımylyn joǵary baǵalady.

Búgingi Úkimet otyrysynda memlekettik qyzmetterdi damytý jáne tsıfrlandyrý taqyryby qaraldy. Onda Kaspi.kz basqarma tóraǵasy Mıhaıl Lomtadze jáne Freedom Holding Corp bas atqarýshy dırektory Tımýr Týrlov bank júıelerinde memlekettik qyzmet kórsetý tártibi týraly baıandady. Olar azamattar men bıznes úshin memlekettik qyzmetterdi alý protsesin yńǵaıly etetin negizgi jobalaryn tanystyrdy.

Óz kezeginde O. Bektenov tsıfrlandyrý men onlaın qyzmetter salasyndaǵy jetistikterdi erekshe atap ótti jáne munyń kóleńkeli ekonomıkany azaıtýǵa kómektesetinin aıtty.

«Memleket tarapynan, árıne, memlekettik qyzmetterdi ári qaraı tsıfrlandyrýdy qoldaımyz. Qazirgi ýaqytta salyq tóleý boıynsha jaqsy sheshimder usynyp otyrsyzdar. Bul bizge de qajet: bıznesti kóleńkeden shyǵarý kerek. Sondyqtan biz birlesip jumys isteýimiz kerek, – dedi Úkimet basshysy. 

Tsıfrlyq damý mınıstrliginiń derekterine sáıkes, búginde Qazaqstanda 1382 memlekettik qyzmet túri, onyń 1265-i elektrondy formatta (91,5%), al 117-si qaǵaz túrinde kórsetiledi. 

eGov arqyly onlaın qyzmet kórsetýge monopolııa joıylyp, negizgi qyzmetterdi tanymal fınteh platformalarǵa shyǵarylǵan. Bul halyqtyń tsıfrlyq servısterge qoljetimdiligin arttyrdy.

Búginnen bastap eGov arqyly kedergi keltirgen kólik ıelerine anonımdi habarlama jiberýge bolady.

Sondaı-aq, sáýirdiń sońyna deıin jeke kýálikti aýystyrý protsesi tolyǵymen onlaın formatqa kóshiriledi.