Premer-mınıstr órt qaýipsizdigi týraly: TJM resmı usynym berýmen shektelip jatyr

ASTANA. KAZINFORM — Premer-mınıstr Oljas Bektenov Úkimet otyrysynda ákimdikterge demalys jáne mereke kúnderi jer úılerge reıd júrgizip, peshterdi tekserýdi tapsyrdy.

— Jalpy elimizdiń turǵyn úı sektorynda órt oqıǵalarynyń sany azaıǵan. Biraq Atyraý, Aqmola, Jambyl jáne Pavlodar oblystarynda onyń óskenin baıqap otyrmyz. Negizgi sebep — halyqtyń pesh jaǵý, sondaı-aq gazben jáne elektrmen jylytý júıelerin qoldaný kezinde qarapaıym qaýipsizdik talaptarynyń saqtalmaýy. Órtke qarsy erejelerdi buzǵany úshin tıimdi sharalar qabyldaý qajet, — dedi úkimet basshysy.

Sondaı-aq, ol bilim oshaqtarynda órt qaýipsizdigi týraly ınteraktıvti sabaqtar ótkizýdi tapsyrdy.

— Demalys jáne mereke kúnderi turǵyn úı sektorynda reıdter júrgizip, jylytý peshterin tekserý qajet. Bul iske ákimdik qyzmetteri men ishki ister mınıstrliginiń qyzmetkerlerin de tartý kerek. Reıd pen tekserý barysynda órt shyǵý qaýpi bar jáne jylytý júıesi durys jumys istemeıtin úıler anyqtalýǵa tıis. Atalǵan faktiler oryn alǵan jaǵdaıda olardy joıý boıynsha jedel sharalar qabyldaǵan jón. Sonymen qatar Tótenshe jaǵdaılar mınıstrligi tek resmı usynymdar berýmen shektelip qalmaýy kerek. Bul — eń aldymen adamdardyń qaýipsizdigine qatysty másele. Sondyqtan óte naqty ári úılesimdi jumys qajet, — dedi Oljas Bektenov.

Aıta ketý kerek, Úkimettiń búgingi otyrysynda jylytý maýsymyndaǵy órt qaýipsizdigi sharalary pysyqtalyp jatyr.