Premer-mınıstr órt qaýpi joǵary kezeńge daıyndyqty kúsheıtýdi tapsyrdy
ASTANA. KAZINFORM — Oljas Bektenov Abaı oblysynda Tótenshe jaǵdaılardy joıý jónindegi respýblıkalyq jedel shtab otyrysyn ótkizdi. Otyrys qorytyndysy boıynsha Premer-mınıstr memlekettik organdar men vedomstvolarǵa birqatar tapsyrma berdi, dep habarlaıdy Úkimettiń baspasóz qyzmeti.
Ekologııa mınıstrligi — óńirlerdi avıapatrýldeýmen tolyqqandy qamtamasyz etsin. Órt qaýpi joǵary kezeńde tikushaqtardyń kezekshiligine qatysty kelisimshart jasaýdy tezdetý kerek. Áýe kemeleri sý shashatyn qurylǵylarmen jabdyqtalyp, orman qoryna jaqyn mańda shoǵyrlanýy tıis. Sondaı-aq órttiń paıda bolý qaýpi joǵary jerlerde qosymsha baqylaý beketteri ornalastyrylsyn. Ormandar men dalany aerovızýaldy sholyp zertteý úshin pılotsyz apparattardy belsendi paıdalaný qajet. Tótenshe jaǵdaılar mınıstrligi ózderiniń áýe kemelerin jumyldyrýy kerek. Sonymen qatar Qorǵanys, Іshki ister mınıstrlikteri men Ulttyq qaýipsizdik komıtetiniń avıatsııalyq bólimsheleri de áýeden baqylaý jáne órt sóndirý jumystaryna tartylyp, óńirler boıynsha tikushaqtardyń ornalasýy qamtamasyz etilsin.
Tótenshe jaǵdaılar mınıstrligi Ekologııa mınıstrligimen jáne basqa da múddeli memlekettik organdarmen birge tabıǵı órtterge qarsy áreket etý jónindegi respýblıkalyq komandalyq-shtabtyq oqý-jattyǵý sharalaryn uıymdastyryp, ótkizsin. Oqý-jattyǵý barysynda transshekaralyq órtterdi sóndirý jáne kórshi memleketterdiń qyzmetterimen ózara is-qımyl jasaý máselelerin pysyqtaý qajet. Sondaı-aq oqý-jattyǵýǵa «Aýyl qutqarýshylary» órt sóndirý beketterin de tartý kerek. Qazirgi tańda olar barlyq óńirlerde belsendi túrde qurylyp jatyr. Biz bul baǵytta jumysty odan ári jalǵastyryp, tabıǵı órtterdi sóndirý kezinde olardyń áleýetin paıdalanýymyz kerek. Sonymen qatar Tótenshe jaǵdaılar mınıstrliginiń ahýaldyq ortalyǵynda órt qaýpi joǵary kezeńde múddeli memlekettik organdardyń ókilderinen quralǵan jedel shtab qurý qajet. Shtab jumysy aıasynda óńirlerdegi órt jaǵdaıyn táýlik boıy baqylaýdy qamtamasyz etý kerek.
Ekologııa mınıstrligi ákimdiktermen birlesip, tabıǵatty qorǵaý jáne orman mekemelerin odan ári jaraqtandyrý jumystaryn jalǵastyrsyn. Ákimdiktermen, Jasandy ıntellekt mınıstrligimen jáne «Qazaqtelekom» kompanııasymen birlesip, órtterdi erte anyqtaý júıelerimen qamtý aıasyn keńeıtip, olardyń «Semeı ormany» rezervatynyń aýmaǵynda da jumys isteýin qamtamasyz etýi qajet.
Jasandy ıntellekt mınıstrligi órtterdi boljaý jáne sóndirý algorıtmderi úshin qoldanystaǵy aqparattyq júıelerdiń ázirligin qamtamasyz etsin. Bul oraıda jerdi qashyqtan zondtaý derekterin paıdalaný qajet. Boljaý nátıjelerin ákimdikterge jáne tıisti memlekettik organdarǵa jetkizý kerek.
Ákimdikter eldi mekenderde erikti órtke qarsy qurylymdardy uıymdastyrý jumystaryn jalǵastyrsyn. Sondaı-aq óńirlerde áýe kemelerin tartý úshin janar-jaǵarmaı materıaldarynyń qajetti qorlaryn qamtamasyz etken jón. Órt sóndirý kólikteri men tikushaqtar sý alý úshin qajetti sý kózderin daıyndaý kerek. Osy uıymdastyrý máseleleriniń barlyǵyn 20-shy sáýirge deıin sheshý qajet.
ІІM — órt qaýpi joǵary kezeńde ormandarda azamattardyń demalýyna jol bermeý jóninde sharalar qabyldasyn. Reıdter men patrýldeý kestesin jasańyzdar. Órt qaýipsizdigi talaptaryn buzýshylardyń barlyǵyn jaýapkershilikke tartý qajet.
Tótenshe jaǵdaılar, Ekologııa, Mádenıet jáne aqparat mınıstrlikteri men ákimdikter órt qaýipsizdigi talaptaryn saqtaý máselesi boıynsha halyq arasynda túsindirý jumystaryn kúsheıtýi tıis.
Tapsyrmalardyń oryndalýyn úılestirý Premer-mınıstrdiń orynbasary Qanat Bozymbaevqa júkteldi.
Budan buryn Qazaqstan Premer-mınıstri Oljas Bektenov Abaı oblysyna jumys sapary barysynda Tótenshe jaǵdaılardy joıý jónindegi respýblıkalyq jedel shtabtyń otyrysyn ótkizdi. Onda 2026 jylǵy órt qaýpi joǵary kezeńge daıyndyq máseleleri qaraldy.
