Premer-mınıstr órt datchıkterin ornatýǵa qatysty tapsyrma berdi
ASTANA. KAZINFORM — Halyqtyń áleýmettik osal toptarynyń úılerine datchıkterdi satyp alý jáne ornatý úshin qarajat qarastyrýy qajet. Bul týraly Úkimet otyrysynda Premer-mınıstr Oljas Bektenov aıtty.
- Ótken jyldardyń tájirıbesi kórsetkendeı, órtterdiń basym bóligi jóndeý kórmegen peshterden, der kezinde tazartylmaǵan murjalardan jáne tozyǵy jetken elektr symdarynan týyndaıdy. Keı jaǵdaıda elektr jelileri men gazben jabdyqtaý kózderine ruqsatsyz qosylý da tótenshe jaǵdaılarǵa ákep soǵady. Ásirese, halyqtyń áleýmettik jaǵynan osal toptarynyń baspanalaryna erekshe nazar aýdarý qajet. Osyndaı úılerde órt qaýipsizdigi talaptaryn buzý jaǵdaılary jıi tirkeledi. Sondyqtan olarǵa órt datchıkterin tegin ornatý tapsyrylǵan bolatyn. Degenmen, bul jumys Túrkistan, Batys Qazaqstan, Mańǵystaý, Jambyl, Qaraǵandy oblystarynda jáne Shymkent qalasynda tıisti deńgeıde júrgizilmeı otyr. Osyǵan baılanysty, óńir ákimdikterine Tótenshe jaǵdaılar, Eńbek jáne halyqty áleýmettik qorǵaý mınıstrlikterimen birlesip, bir apta merzimde halyqtyń áleýmettik osal toptaryna jatatyn turǵyn úılerdiń tizimin jańartýdy tapsyramyn, - dedi O. Bektenov.
Onyń aıtýynsha, anyqtalǵan kemshilikterdi joıý sharalaryn qabyldaı otyryp, úı-úıdi qaıtadan aralap shyǵý kerek.
- Jalpy órt datchıkterin ornatý jumystaryn kúsheıtken jón. Óńir ákimdikteri tıisti qyzmetterge qajetti qoldaý kórsetip, halyqtyń áleýmettik osal toptarynyń úılerine datchıkterdi satyp alý jáne ornatý úshin qarajat qarastyrýy qajet, - dedi Premer-mınıstr.
Buǵan deıin habarlanǵandaı, Qazaqstanda turmystyq gaz ballondaryna mindetti tańbalaý engiziledi.