Premer-mınıstr Oljas Bektenov Astanadaǵy LRT qurylysynyń qarqynyn tekserdi
ASTANA. KAZINFORM – Qazaqstan Premer-mınıstri Oljas Bektenov elordada jeńil relsti kólik (LRT) jelisin salý jónindegi jobanyń barysyn tekserdi.
Astana qalasynyń ákimi Jeńis Qasymbek nysannyń daıyndyq deńgeıi jáne megapolıstiń kólik júıesin odan ári damytý keleshegi týraly baıandady.
Búgingi tańda LRT estakadasynyń arqalyqtaryn tóseý kezeńi aıaqtaldy. Ctansalardyń negizgi temirbeton konstrýktsııalary qurylysyn 2024 jyldyń sońyna deıin aıaqtaý josparlanyp otyr. Kelesi jyly relsterdi tóseý, stansalardy árleý jáne jyljymaly quramdardy jetkizetin depo qurylysyn júrgizý, Qabanbaı batyr dańǵyly men Qaldaıaqov kóshesi boıyndaǵy estakadalyq bólikti abattandyrý júrgiziledi.
Jeńil relsti jeliniń jalpy uzyndyǵy 22,4 km quraıdy. LRT quramyna 18 stansa kiredi. 652 adam syıatyn 19 jyljymaly quramdy iske qosý josparlanyp otyr. Qozǵalys aralyǵy 4-5 mınýtty quraıdy. Bastapqy kezeńde táýligine 25 myń adam jolaýshylar aǵyny kútiledi, bul rette jolaýshylar aǵyny eń joǵary ýaqytta táýligine 92 myń adamǵa jetýi múmkin. Tólem júıesi qalalyq analogy boıynsha, kólik kartasyn valıdatsııalaý nemese QR-kod arqyly tóleý arqyly qarastyrylǵan.
Stansa aýmaǵynda Premer-mınıstr qurylys barysynda qoldanylatyn tehnologııalyq sheshimdermen tanysty.
Jobany iske asyrýǵa China Construction Sixth Bureau, Yunnan Construction and Investment Holding Group Co., Longjian Road and Bridge Co., Tianjin Rail Transit Group Co., CRRC Tangshan Co LTD. sııaqty joǵary standarttardy saqtaýymen tanymal qytaılyq jetekshi kompanııalar tartylǵan. Sondaı-aq CRSCInternational, CASCO, HUAWEI Smart Transport BU kompanııalary kólik júıesiniń qaýipsiz ári tıimdi jumysyn qamtamasyz etýde sheshýshi ról atqaratyn baılanys, dabyl jáne avtomattandyrý júıelerin retteýge qatysady. China Railway Asia-EuropeConstruction Investment qosalqy merdiger kompanııasynyń bas dırektory Chjoý Haıveı ınnovatsııalyq tehnologııalar qoldanylyp jatqanyn baıandady. Joba aıaqtalǵannan keıin jeńil relsti jeli boıymen júrgizýshisiz poıyzdar iske qosylady.
«City Transportation Systems» JShS basqarma tóraǵasy Asylbek Dúısebaevtyń aıtýynsha, barlyq qurylys jumysyn aıaqtaý jáne LRT iske qosý 2025 jyldyń sońyna deıin josparlanǵan.
Óz kezeginde Oljas Bektenov jobanyń sapasy men iske asyrylý merzimderin baqylaýdy kúsheıtý qajettigin atap ótti.
«Memleket basshysy elimizdiń kólik júıesin damytýǵa kóp kóńil bóledi. LRT jobasy boıynsha ınfraqurylymdy daıyndaý boıynsha úlken jumys júrgizildi, qarajat bólindi. LRT qala turǵyndaryna, elorda qonaqtaryna qyzmet etedi. Qurylys jumystarynyń qarqyny artyp keledi, olardy báseńdetpeý mańyzdy. Joba eń joǵary deńgeıde júzege asyrylýy kerek. Ákimdik pen ortalyq memlekettik organdar tarapynan baqylaý kúsheıtilýi tıis. Nátıjege jumys isteıtin bolamyz», - dedi Premer-mınıstr.
