Premer-mınıstr nege BI Group pen BAZIS-A-ǵa shúılikti – Serik Jumanǵarınniń jaýaby

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet basshysy Oljas Bektenovtiń salyq máselesine arnalǵan jıynda nege BI Group pen BAZIS-A kompanııalaryna shúılikkenin túsindirdi.

— Sizder kameraldyq baqylaýdyń qorytyndysy boıynsha habarlama jiberilip jatqan kompanııalardyń deńgeıin túsinsin degen oımen siz aıtyp turǵan kompanııalardy ataý týraly sheshim qabyldanǵan bolatyn. Óıtkeni el ishinde eshkim qol tıgize almaıtyn kompanııalar bar, al beıshara orta jáne shaǵyn bıznes búkil aýyrtpalyqty arqalap jatyr degen túsinik qalyptasqan. Sondyqtan Premer-mınıstr Oljas Abaıuly qandaı kompanııalarmen jumys istep jatqanymyzdy kórsetý úshin osylardy atady. Birden aıtaıyn, qol tıgizýge bolmaıtyn kompanııa joq. Bári salyq tóleıdi, — dedi ol Májilis otyrysynan keıin BAQ ókilderiniń suraǵyna bergen jaýabynda.

Vıtse-premer mundaı tásil salyq organdarynyń qalypty jumysy ekenin atap ótti. 

— Bul jerde áketip bara jatqan eshteńe joq. Byltyr salyq komıteti siz aıtyp turǵan sııaqty 400 myńnan astam habarlama joldaǵan bolatyn. Bul olardyń turaqty jumysy. Tek bul joly sizderge sonyń keıbir tusyn aqtaryp kórsettik. Óıtkeni shyǵyndardy únemdeý, qosymsha kiris kózderin izdeý jumystarymen eshkim aınalysyp jatqan joq degenge saıatyn syn óte kóp aıtylyp ketti. Bul joly salyq komıtetiniń keıbir aspektileri ǵana sizderge ashyp kórsetildi. Onyń ishinde blogerlerge jiberilgen habarlamalar da bar. 15 bloger qazirdiń ózinde 1,5 mlrd teńge tabysyn qaıta kórsetip, 75 mln teńge salyq tólegenin bilesizder. Al qazirgi iri kompanııalarǵa, qurylys kompanııalaryna qatysty másele salyq komıtetiniń qalaı jumys istep jatqanyna mysal bola alady. Shyn máninde ondaı habarlamalar óte kóp jiberilip jatyr, — dedi Serik Jumanǵarın.

Eske salsaq, ótken aptada Premer-mınıstr kásipkerlerdi eki aptada salyq somasyn ádiletti túrde tóleýge shaqyrǵan bolatyn.