Premer-mınıstr merekede TJM kúshterine órt qaýipsizdigine basa nazar aýdarýǵa shaqyrdy
ASTANA. KAZINFORM — Bul týraly Premer-mınıstr Oljas Bektenov quqyq buzýshylyqtyń aldyn alý jónindegi vedomstvoaralyq komıssııa otyrysynda aıtty, dep Úkimettiń baspasóz qyzmeti jazdy.
Mereke kúnderi órt qaýipsizdigin qamtamasyz etý máselesine de kóńil aýdaryldy. Іs-sharalardyń basym bóligi adamdar kóp jınalatyn nysandarda, sondaı-aq oıyn-saýyq jáne qoǵamdyq oryndarda ótedi. Onyń ishinde pırotehnıkalyq ónimder de qoldanylady. Búginde aınalymnan 700 birlikten astam jáne 97 qorap sertıfıkattalmaǵan pırotehnıka alyndy. Mereke qarsańynda taǵy bir márte «Quqyqtyq tártip» profılaktıkalyq is-sharalaryn ótkizý tapsyryldy. Onyń aıasynda pırotehnıkalyq ónimderdi saqtaý jáne satý oryndaryna reıdter uıymdastyrylatyn bolady.
— Órt qaýipsizdiginiń tıisti deńgeıin qamtamasyz etýge basa nazar aýdaryldy. TJM kúshterimen adamdar kóp jınalatyn 7 myńnan astam nysanǵa tekserý júrgizildi jáne órt qaýipsizdigi boıynsha anyqtalǵan zańbuzýshylyqtar joıyldy. Jańa jyldyq is-sharalar ótkiziletin oryndar tekserilip, paıdalanýǵa ruqsat berildi. Halyqtyń áleýmettik osal sanatyndaǵy azamattar turatyn turǵyn úılerde órtke qarsy datchıkterdi montajdaý jalǵasýda. Qazirgi ýaqytta 36 myńnan astam qorǵanys qurylǵylary ornatylǵan, — delingen habarlamada.
Premer-mınıstr is-sharalar ótkiziletin nysandardaǵy qaýipsizdiktiń tıisti deńgeıin qamtamasyz etýdi tapsyrdy. Osy maqsatta nysandarda aldyn ala tekserý, qyzmetkerlerge tıisti nusqaýlar berý, oqý-jattyǵý jumystaryn júrgizý qajettigine nazar aýdardy. Ásirese órt sóndirý quraldary men gıdranttardyń jaramdylyǵyn tekserý qajet. Aýa raıyna qaramastan, adamdar kóp jınalatyn nysandarǵa baratyn joldar táýlik boıy ashyq bolýy kerek. TJM men ІІM birlesip, tıisti sharalar qabyldaýy tıis. Sonymen qatar adamdardy shuǵyl evakýatsııalaý boıynsha is-qımyldardy pysyqtap, qajet bolsa, qosymsha oqý-jattyǵýlaryn ótkizý qajet.
Aıta keteıik, buǵan deıin Oljas Bektenov aldaǵy merekede ishki ister organdaryna qoǵamdyq tártipti qorǵaýdy tapsyrdy.