Premer-mınıstr Memleket basshysynyń atynan Toqtar Áýbákirovti 80 jyldyq mereıtoıymen quttyqtady

-Halqymyz ózińizdi áıgili ǵaryshker, kórnekti qoǵam qaıratkeri, otansúıgish azamat retinde aıryqsha qadirleıdi. Sizdiń eńbek jolyńyz jarqyn belesterden turady. Biraz jyl kásibı ushqysh bolyp, jańa áskerı ushaqtardy synaqtan ótkizip, eren erliktiń úlgisin kórsete bildińiz. Siz zeńgir kókke kóterilgen qazaqtyń tuńǵysh ǵaryshkeri atandyńyz. Elimizdiń álem aldyndaǵy mártebesin arttyrýǵa, halyqaralyq yntymaqtastyqty nyǵaıtýǵa, ulttyq aeroǵarysh, qorǵanys ónerkásibi salalarynyń damytýyna qosqan úlesińiz óte mol. Parlament Májilisiniń depýtaty bolǵan kezińde tereń bilimińiz ben ómirlik tájirıbeńizdi otandyq zańnamany jetildirý isine arnadyńyz. Aldaǵy kezeńde eseli eńbegińizdiń jemisin kórip, el-jurttyń syı-qurmetine bólene berýińizge tilektestigimdi bildiremin. Sizge myqty densaýlyq, uzaq ǵumyr, otbasyńyzǵa baq-bereke tileımin, — delingen Prezıdent Qasym-Jomart Toqaevtyń quttyqtaý hatynda, — delingen Prezıdent Qasym-Jomart Toqaevtyń quttyqtaý hatynda.

Premer-mınıstr 1 shildede Qazaqstan Respýblıkasynyń jańa Konstıtýtsııasy kúshine engenin atap ótti. Atalǵan qujat Ádiletti memleket qurý tujyrymdamasyn bekitip, elimizdiń odan ári damý baǵdaryn aıqyndaıdy.

 -Búginde Prezıdentimizdiń «Ádiletti Qazaqstan» bastamasyna árdaıym qoldaý bildirip, jańa Konstıtýtsııada aıqyndalǵan ulttyń jańa sapasyn qalyptastyrý isine de aıanbaı atsalysyp júrsiz. Óıtkeni, otanshyldyq, ádildik, zań men tártip, erlik pen eńbekqorlyq sııaqty asyl qasıetterdi jastardyń boıyna sińirýde Alash jurtynyń adal perzenti, halqymyzdyń has batyry retinde Sizdiń alatyn ornyńyz erekshe, — dep atap ótti Oljas Bektenov.

Saltanatty is-sharaǵa aeroǵarysh salasynyń, Qarýly kúshter men Generaldar keńesiniń ókilderi, sondaı-aq otandyq jáne sheteldik ǵaryshker-ushqyshtar, synaqshy-ushqyshtar, ınjenerler men konstrýktorlar qatysty.

Jıynǵa qatysýshylar aldynda sóz sóılegen Premer-mınıstr ǵarysh salasynyń Qazaqstannyń tehnologııalyq damýyna qosyp otyrǵan mańyzdy úlesin atap ótti. Elimizde ulttyq spýtnıktik baılanys jáne Jerdi qashyqtan zondtaý júıeleri jumys isteıdi, aýyl sharýashylyǵy, ekologııa jáne ózge de salalardyń qajettiligi úshin derekterdi óńdeý júıesi jetildirilýde, sonymen qatar derekterdi óńdeý múmkindikteri keńeıtilip, shalǵaıdaǵy eldi mekenderdiń ınternetke qoljetimdiligi artyp keledi. Sondaı-aq Baıqońyr ǵarysh aılaǵynan «Suńqar» zymyran-tasyǵyshynyń sátti synaqtyq ushyrylýy otandyq ǵarysh salasynyń damýyndaǵy jańa kezeńniń bastalýyna jol ashqany erekshe atap ótildi.

Aıta keteıik, 27 shildede tuńǵysh qazaq ǵaryshkeri, Keńes Odaǵynyń batyry, Halyq qaharmany, kórnekti memleket jáne qoǵam qaıratkeri, avıatsııa general-maıory Toqtar Áýbákirov 80 jasqa toldy.