Premer-mınıstr mektep ashanalarynda tamaqtaný standartyn ázirleýdi tapsyrdy
ASTANA. KAZINFORM – Premer-mınıstr Prezıdenttiń mektep ashanalarynda tamaqtaný sapasyn jaqsartý jónindegi tapsyrmalaryn iske asyrý sheńberinde biryńǵaı Tamaqtaný standartyn ázirleýdi jáne qabyldaýdy tapsyrdy. Bul týraly QR Úkimetiniń baspasóz qyzmeti málim etti.
Premer-Mınıstr Oljas Bektenovtiń tóraǵalyǵymen ótken Úkimet otyrysynda bastaýysh synyp oqýshylary men az qamtylǵan otbasylardan shyqqan balalardy mektepte tegin ystyq tamaqmen qamtamasyz etý máseleleri qaraldy. Oljas Bektenov balalarǵa beriletin tamaqtyń sapasy muqııat tekserýdi qajet etetinin atap ótti.
«Búgingi tańda 403 mektepte ashana joq, sondyqtan onda balalar ystyq tamaqpen tolyqqandy qamtamasyz etilmegen. Mekteptegi, ásirese shaǵyn jáne shalǵaıdaǵy mektepterde qaýipsiz tamaqtanýdy uıymdastyrý máselesinde tolyq tártip ornatý qajet. Tamaqtaný sapasyn jaqsartý jáne jetkizýshІlerdiń jaýapkershiligin arttyrý boıynsha naqty sharalar qabyldaǵan jón», — dedi Premer-Mınıstr.
Premer-mınıstr jyl sońyna deıin tamaqtaný standartyn qabyldaýdy tapsyrdy. Qujat sarapshylar men ǵalymdardyń qatysýymen jasalýy kerek. Tıisti mindet bilim jáne densaýlyq saqtaý mınıstrlikteriniń aldyna qoıyldy.
Oqý-aǵartý jáne Qarjy mınıstrlikterine mindetin adal atqarmaǵan jetkizýshiler tizilimin avtomattandyryp, osyndaı satyp alýǵa qatysýshylardyń ákimshilik jaýapkershiligin belgileý jóninde sharalar qabyldaý tapsyryldy.
Ákimdikter mektep ashanalarynyń materıaldyq-tehnıkalyq bazasyn jaqsartý máselesin erekshe baqylaýǵa alýy kerek. Sonymen qatar ınflıatsııa deńgeıin eskere otyryp, tamaqtaný qunyn qaıta esepteý jáne oǵan qosymsha qarajat bólý qajet. Jyl sońyna deıin bıýdjet qarajatyn paıdalanýdyń ashyqtyǵyn qamtamasyz etý úshin apparattyq-baǵdarlamalyq keshende ornatýdy jáne olardy «Áleýmettik ámııan» aqparattyq júıesimen ıntegratsııalaýdy qamtamasyz etý mańyzdy.
Densaýlyq saqtaý mınıstrligine balalardy tamaqtandyrýdy uıymdastyrý boıynsha monıtorıng pen sanıtarlyq-epıdemıologııalyq baqylaý sharalaryn kúsheıtý, qajetti normatıvtik túzetýler engizý tapsyryldy.
Buǵan deıin habarlanǵandaı, bıyl mektep ashanasynda balalardyń tamaqtan ýlanýyna qatysty 9 aıda 12 qylmystyq is qozǵaldy.
Aıta ketsek, «Ádildik jáne órkendeý» qoǵamdyq qory memlekettik mektepterdegi tamaq sapasyna qatysty áleýmettik saýalnama júrgizgen bolatyn. Saýalnama kórsetkendeı, ata-analarynyń 53%-ynyń ǵana mekteptegi tamaqtaný sapasyna kóńili tolady.
