Premer-mınıstr QTJ-nyń aldyndaǵy basty mindetterdiń birin atady
ASTANA. KAZINFORM – Eýrazııa keńistiginde kólik-logıstıkalyq habqa aınalý úshin temirjol ınfraqurylymyn damytýdyń kelesi kezeńine daıyndalý qajet. Bul týraly Úkimet otyrysynda Premer-mınıstr Oljas Bektenov málim etti.
- Jańa temirjol jelilerin salý, vagondar men lokomotıvter parkin jańartý, qoldanystaǵy joldardy jańǵyrtý jáne vokzaldardy rekonstrýktsııalaý baǵytynda aýqymdy jumys atqarylyp jatyr. Prezıdenttiń tikeleı tapsyrmasy boıynsha bıyl birqatar iri ınfraqurylymdyq jobany aıaqtaý josparlandy. Olardyń ishinde «Darbaza – Maqtaaral», «Moıynty – Qyzyljar» jelileri de bar. Atalǵan ýchaskelerdegi qozǵalysty osy jyldyń qarasha aıynda iske qosý qajet. Jańa joldardyń ashylýy tranzıttik tasymal kólemin bıyl 55 mln tonnaǵa deıin ulǵaıtýǵa múmkindik beredi. Bul – Kólik mınıstrligi men «Qazaqstan temir joly» kompanııasynyń aldynda turǵan eń basty mindetterdiń biri, - dedi O. Bektenov.
Sonymen qatar Úkimet basshysy bar jobalarmen ǵana shektelip qalmaý kerek ekenin atap ótti. El ekonomıkasynyń odan ári ósýin qamtamasyz etip, Eýrazııa keńistiginde kólik-logıstıkalyq habqa aınalý úshin temirjol ınfraqurylymyn damytýdyń kelesi kezeńine daıyndalý qajet.
- Usynylyp otyrǵan salany damytýdyń úshjyldyq josparyn jalpy qoldaımyz. Kólik mınıstrligi, «Samuryq-Qazyna» qory men «Qazaqstan temir joly» barlyq bolashaǵy zor ınfraqurylymdyq jobalardy qarjylandyrý kózderin aıqyndap, tehnıkalyq qujattamany ázirleýge dereý kirisýge tıis. Júk aınalymy men tranzıttik tasymaldardyń boljamdy ósýin jáne ekonomıkanyń uzaq merzimdi qajettilikterin negizge ala otyryp, ýaqyttyń talabyna saı belsendi sheshimder qabyldaý óte mańyzdy. Sondaı-aq memleketaralyq ótkizý pýnktteri toraptaryn keńeıtý eksporttyq jáne tranzıttik baǵyttaǵy júk tasymalyn arttyrýǵa múmkindik beredi. Sondyqtan kórshiles elderdiń temirjol ákimshilikterimen birlesken sheshimder ázirleý úshin turaqty jumys júrgizý qajet.
Budan buryn habarlanǵandaı, 2040 jyly temirjol arqyly tranzıttik tasymal 100 mln tonnaǵa jetkizilmek.
