Premer-mınıstr qoqys tastaıtyn adamdarǵa jazany qatańdatýdy tapsyrdy
ASTANA. KAZINFORM — Úkimet basshysy Oljas Bektenov qorshaǵan ortany lastaǵan adamdarǵa qatysty qatań sharalar qoldanýdy júktedi.
— Jaz aılarynda kóptegen adam tabıǵat aıasyna demalysqa shyǵyp, qoqys qaldyryp ketedi. Osy baǵyttaǵy jumysty kúsheıtý kerek. Ekologııa jáne tabıǵı resýrstar mınıstrligi, Іshki ister mınıstrligi qorshaǵan ortany lastaǵan adamdardy jaýapkershilikke tartýǵa tıis. Olarǵa qatysty qatań sharalar qoldana otyryp, keń aýqymdy túsindirý jumysyn júrgizý qajet, — dedi Oljas Bektenov Úkimet otyrysynda.
Ekologııa jáne tabıǵı resýrstar mınıstrliginiń málimetinshe, «Taza Qazaqstan» bastamasynyń aıasynda 2024 jyly keshendi sharalar qabyldandy. Nátıjesinde 2019-2023 jyldary orta eseppen 62 ekologııalyq aktsııa ótkizilse, 2024 jyly bul kórsetkish 183-ke jetti. Eger ótken 5 jylda aktsııalarǵa 2,4 mln adam qatysyp, 900 myń tonna qoqys jınalyp, shamamen 2,5 mln jasyl jelek otyrǵyzylsa, 2024 jyly ekologııalyq aktsııalarǵa 6,2 mln adam qatysyp, 1,1 mln tonna qoqys jınaldy, shamamen 1,6 mıllıon aǵash egildi.