Premer-mınıstr: Qazaqstan Chehııany senimdi seriktes retinde qarastyrady
ASTANA. KAZINFORM — Elimiz atalǵan memleketpen ekonomıkanyń barlyq sektorynda jan-jaqty seriktestikti damytýǵa daıyn. Bul jóninde QR Premer-mınıstri Oljas Bektenov Qazaqstan — Chehııa bıznes forýmynda málimdedi.
— Astana Chehııa Respýblıkasyn Eýropalyq odaqtaǵy senimdi ári keleshegi zor seriktes retinde qarastyrady. Saýda-ekonomıkalyq seriktestik týraly kelisim, sondaı-aq, Investıtsııalardy kótermeleý jáne ózara qorǵaý týraly kelisim tárizdi qujattar — berik quqyqtyq negiz. Olar elderimizdiń arasyndaǵy ekonomıkalyq baılanysty nyǵaıtady, — dedi ol.
Sonymen qatar, Úkimet basshysy Qazaqstannyń aımaqtaǵy áleýetine toqtaldy.
— Qazaqstan óńirdegi eń iri ekonomıka retinde ekonomıkasyn ártaraptandyrý úshin keshendi reformany jalǵastyryp jatyr. Bul maqsatta ǵylym-bilimge negizdelgen damý modeli men ınnovatsııaǵa jete kóńil bólinip keledi. Nátıjesinde, byltyr JІÓ 6,5%-ǵa ósti. Al álemde bul kórsetkish ortasha eseppen 3%-ǵa joǵary ekenin eskersek, Qazaqstannyń statıstıkasy aıtarlyqtaı joǵary, — dedi ol.
Sonymen birge, Oljas Bektenov elimizge tartylǵan ınvestıtsııa kólemine toqtaldy.
— Sheteldik tikeleı ınvestıtsııalar mólsheri 14,4%-ǵa ósip, 20,5 mlrd dollarǵa jetti. UNESCAP dereginshe, 2025 jyly Qazaqstan jańa jobalarǵa 19 mlrd dollar ınvestıtsııa tartty. Bul Ortalyq Azııaǵa quıylǵan aımaqaralyq barlyq ınvestıtsııanyń 89%-y. Ashyq saıasat pen ınvestorlarǵa jaıly jaǵdaı jasaýdyń arqasynda halyqaralyq seriktesterimiz artyp keledi. Olardyń ishinde Chehııa da bar, — dedi Premer-mınıstr.
Sonymen birge, ol Qazaqstan Chehııany damyǵan ındýstrııalyq memleket retinde qarastyratynyn jáne ekonomıkanyń barlyq sektorynda jan-jaqty seriktestikti damytýǵa daıyn ekenin málimdedi.
Aıta keteıik, buǵan deıin Qazaqstan men Chehııa arasyndaǵy taýar aınalymy 700 mln dollardan asqanyn jazǵanbyz.
Sonymen qatar, búginde respýblıkada Chehııa úlesi bar 150 kompanııa jumys isteıdi.
