Premer-mınıstr Qazaq ulttyq sport ýnıversıtetiniń jumysyn baǵalady
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Prezıdent tapsyrmasyna sáıkes, Astana qalasynda ashylǵan Qazaq ulttyq sport ýnıversıtetiniń jańa ǵımaratyndaǵy tehnologııalyq jaraqtandyrý deńgeıimen jáne bilim berý jaǵdaıymen tanysty. Bul týraly Úkimettiń baspasóz qyzmeti málim etti.
— 1 shildede jalpyhalyqtyq referendýmda qabyldanǵan jańa Konstıtýtsııa kúshine endi. Onda adamı kapıtaldy damytý memlekettiń strategııalyq baǵyty retinde aıqyndalǵan. Prezıdent Qasym-Jomart Kemeluly Toqaevtyń tapsyrmasy boıynsha Qazaq ulttyq sport ýnıversıteti ashyldy. Táýelsiz Qazaqstan tarıhynda alǵash ret sport, bilim berý, medıtsına jáne ınnovatsııa toǵysynda ulttyq mekemeniń iske qosylýy bizdiń qundylyq baǵdarlarymyzdy aıqyn kórsetedi. Biz jańa býyn mamandaryn daıarlap jatyrmyz, — dep atap ótti Premer-mınıstr.
Ýnıversıtet «Jattyqtyrýshylyq qyzmet», «Sport ǵylymdary» bilim berý baǵdarlamalary boıynsha, sondaı-aq sporttyq medıtsına jáne ońaltý, sport jýrnalıstıkasy, menedjment, sporttaǵy jasandy ıntellekt jáne analıtıka, kıbersport jáne basqa da baǵyttar boıynsha mamandar daıarlaıdy. Búginde Qazaq ulttyq sport ýnıversıteti Eklore-ed School of Management, Corvinus University, University of Guglielmo Marconi, Swiss Institute ı Hungarian University of Sports Science sekildi sheteldik jetekshi seriktestermen birlesip, qos dıplomdy bilim berý baǵdarlamalaryn, akademııalyq utqyrlyqty jáne sport ǵylymyn damytý jumystaryn júzege asyrýda. Xinhua Daily Media Group pen Nanjing Polytechnic Institute qatysýymen sport jýrnalıstıkasy medıa ortalyǵy qurylyp jatyr.
Sonymen qatar JOO aýmaǵynda qaýipsizdik, adal sport jáne talantty jastardy qoldaý salasyndaǵy jobalar júzege asyrylýda. Olardyń ishinde qutqarý ınnovatsııalary jáne alǵashqy kómek ortalyǵy bar, onda 3,5 myńnan astam pedagog oqytylyp, 100-den astam halyqaralyq sarapshy-jattyqtyrýshylar daıyndaldy. Áıelderdiń sporttaǵy múmkindikterin keńeıtýge baǵyttalǵan QR áıelder bastamasy, sondaı-aq Life Chance Grant jáne Merit Grant grant baǵdarlamalary da júzege asyrylmaq.
Munda sporttyq medıtsına jáne ońaltý ortalyǵy da damyp keledi. Ol sportshylardy dıagnostıkalaý, emdeý, qalpyna keltirý jáne ǵylymı qoldaýdyń zamanaýı tehnologııalaryn biriktiredi. Bilim, klınıkalyq praktıka men ǵylymdy ıntegratsııalaý jańa býyn mamandaryn daıarlaýǵa jáne qalpyna keltirýdiń zamanaýı ádisterin engizýge múmkindik beredi.
Premer-mınıstr Qazaq ulttyq sport ýnıversıteti bilim, ǵylym men praktıkany ıntegratsııalaý ortalyǵy, sondaı-aq bilikti mamandardy daıarlaýdyń ozyq óńirlik ortalyǵy bolýǵa tıis ekenin atap ótti.
— Stýdentter Prezıdenttiń Ádiletti ári Ozyq Qazaqstandy qurý jónindegi ıdeıasyn naqty júzege asyryp, jaýapkershilikke negizdelgen jasampaz otanshyldyqtyń shynaıy jaqtastary bolǵany mańyzdy. Sondyqtan professorlyq-oqytýshylyq quram bilim alýshylardyń boıyna Jańa Konstıtýtsııada aıqyndalǵan eńbekqorlyq, ozyq oıly ult jáne bilim qundylyqtaryn sińirýge erekshe mán berýi qajet. Qazaq ulttyq sport ýnıversıteti otandyq sportty damytýǵa, joǵary bilikti mamandar daıarlaýǵa jáne elimizdiń halyqaralyq bedelin nyǵaıtýǵa qomaqty úles qosatynyna senimdimin, — dep atap ótti Oljas Bektenov.
Joǵary oqý ornyn aralaý barysynda ǵylymı jetistikter kórmesinde Premer-mınıstrge, sondaı-aq, jattyǵý protsesiniń sapasyn arttyrýǵa jáne sportshylardy medıtsınalyq súıemeldeýge baǵyttalǵan ázirlemeler, sonyń ishinde Smart Performance Assessment, Sport Science Control Center + My KNUS, AI Video Analytics for Sports and Digital Biomechanics Lab, Smart Table Tennis AI Center, Sport Media Convergence Co-Creation Lab ı Smart Golf AI Lab zerthanasy tanystyryldy. Sondaı-aq, Qazaq ulttyq sport ýnıversıtetinde sportta jasandy ıntellekt pen derbestendirilgen tásildi qoldaný jónindegi ǵylymı jobalar júzege asyrylýda. Olardyń biri orta jáne egde jastaǵy adamdardy jasandy ıntellekt tehnologııasyn qoldana otyryp, buqaralyq sportqa tartýǵa baǵyttalǵan. Taǵy bir joba derbestendirilgen tásil men medıtsınalyq-bıologııalyq zertteýler jáne jasandy gıpoksııalyq jattyǵýlar negizinde qazaq kúresimen shuǵyldanatyn sportshylardyń daıarlyǵyn jetildirýge arnalǵan.
Ýnıversıtet stýdenti Daryn Tuıaq sportshynyń fýnktsıonaldyq jaǵdaıyn keshendi baǵalaýǵa arnalǵan Smart Performance Assessment ázirlemesin tanystyrdy. Júıe tynys alý kórsetkishterin, ókpeniń jeldetilý deńgeıin, júrek soǵý jıiligin jáne qandaǵy ottegimen qanyǵý deńgeıin taldaıdy. Sondaı-aq derekterdi avtomatty túrde óńdep, sportshynyń tsıfrlyq profılin qalyptastyrady. Mundaı tásil sportshynyń daıyndyǵyn jedel baǵalaýǵa jáne jattyǵý júktemesin der kezinde túzetýge múmkindik beredi.
Stýdent Aıbıke Óskenbaı MY KNUS platformasy men SportAI qosymshasynyń jumysyn tanystyrdy. MY KNUS «bir tereze» qaǵıdaty boıynsha ázirlenip, ýnıversıtettiń bilim berý, ákimshilik jáne servıstik úderisterin bir mobıldi qosymshaǵa biriktiredi. Al SportAI sportshylardyń tsıfrlyq profılin qalyptastyryp, taǵylatyn smart-qurylǵylardan alynǵan derekterdi biriktiredi. Júıe jattyǵý júktemesin, sportshynyń fýnktsıonaldyq jaǵdaıyn, jaraqat alý táýekelderin jáne qımyl-qozǵalys tehnıkasyn taldaıdy. Mundaı tsıfrlyq sheshimder sportshylardy daıarlaýda ǵylymı negizdelgen tásildi qoldanýǵa múmkindik beredi.
Taǵy bir ázirleme – AI Video Analytics for Sports and Digital Biomechanics Lab. Ol kompıýterlik kórý tehnologııalary men tsıfrlyq bıomehanıkany qoldana otyryp, sportshylardyń qımyl-qozǵalysyn obektıvti taldaýǵa arnalǵan. Júıeniń jumysyn stýdent Ál-Farabı Qubaıdolla tanystyrdy. Platforma sportshy denesiniń negizgi núktelerin tirkep, qımyl-qozǵalysty oryndaý tehnıkasyn taldaıdy jáne jattyǵý protsesiniń tıimdiligin arttyrý maqsatynda mamandarǵa qozǵalys belsendiligin baǵalaýǵa múmkindik beredi.
Smart Table Tennis AI Center sportshylardy ústel tennısine daıyndaý úshin sport ǵylymyn, kompıýterlik kórýdi jáne tsıfrlyq taldaý ádisterin biriktiredi. Stýdent Tamerlan Baltash onyń damý múmkindikterin aıqyn kórsetti. Júıe naqty ýaqyt rejıminde qozǵalys bıomehanıkasyn, doptyń ushý traektorııasy men jyldamdyǵyn, soqqylardyń dáldigin jáne oıyn áreketterin baǵalaıdy, jattyǵý protsesin ońtaılandyrý úshin analıtıkalyq usynystar jasaıdy.
Ýnıversıtet qyzmetkeri Aıgúl Tashetova Xinhua Daily Media Group-pen birlesip qurylǵan Sport Media Convergence Co-Creation Lab zerthanasyn usyndy. Zerthana sporttyq jýrnalıstıka, medıa-óndiris jáne tsıfrlyq kommýnıkatsııalar, sonyń ishinde sporttyq jarystardy kommentatorlyq súıemeldeý, habar taratý jáne mýltımedııalyq kontent qurý salasyndaǵy mamandardy praktıkalyq daıarlaýǵa arnalǵan.
Stýdent Aısara Bısenova Smart Golf AI Lab. jobasyn usyndy. Joba beıne jáne sporttyq analıtıkany, sportshylardyń tsıfrlyq profılderin jáne vırtýaldy golf-sımýlıatoryn paıdalanady, bul óńirge qaramastan sapaly oqytýǵa qoljetimdilikti keńeıtýge jáne oqý protsesiniń tıimdiligin arttyrýǵa múmkindik beredi.
