Premer-Mınıstr Qaraǵandy oblysyndaǵy birqatar óndiristik kásiporyndy aralady
QARAǴANDY. KAZINFORM – Qazaqstan Premer-Mınıstri Oljas Bektenov Qaraǵandy oblysyna jumys saparymen baryp, birqatar negizgi óndiristik kásiporyndy aralady, sondaı-aq ónerkásip sektorynyń ózekti máselelerimen tanysty. Bul týraly QR Premer-Mınıstriniń baspasóz qyzmeti habarlady.
«Saryarqa» arnaıy ekonomıkalyq aımaǵyn aralaý barysynda Oljas Bektenov «Steel Manufacturing» patron zaýytynyń jumysymen tanysty.
Qazaqstandyq patron zaýyty – qorǵanys-ónerkásip keshenindegi joǵary tehnologııalyq birden-bir kásiporyn.
Munda qaýipsizdik máselesine jáne óndiristi avtomattandyrýǵa basymdyq berilgen, óndiristik protsestiń barlyǵy adamnyń qatysýynsyz, avtomatty túrde júzege asyrylady.
Premer-Mınıstr zaýyt óndiristik qýatyn tolyǵymen paıdalanyp jumys isteýi kerek ekenin, sol sebepti ony salalyq vedomstvolardyń josparǵa saı tapsyrystarymen júkteý qajettigin atap ótti.
Sondaı-aq Oljas Bektenov «Qaraǵandy – Balqash – Almaty» avtojolyn rekonstrýktsııalaý barysy týraly baıandamalardy tyńdady. Búgingi tańda jańa asfalt boıynsha jol qozǵalysy qamtamasyz etilgen, aınalma joldar tek jol ótpeleri salynyp jatqan ýchaskelerde ǵana qalyp otyr.
Úkimet basshysy barlyq jumysty jyl sońyna deıin aıaqtaý qajettigin atap ótti.
Odan keıin Oljas Bektenov Qarmet metallýrgııalyq kombınatynyń óndiristik tsehtaryna bardy.
QR Prezıdenti Qasym-Jomart Toqaevtyń tapsyrmasy boıynsha memleket ony ári qaraı damytýǵa qajetti qoldaý kórsetýde.
Munda Premer-Mınıstr metallýrgtermen áńgimelesti, onyń barysynda kásibı mamandyq mártebesin arttyrý, jalaqyny ulǵaıtý, jas mamandardy daıarlaý úshin jańa oqý oryndaryn qurý, sondaı-aq basqa da birqatar másele kóterildi.
Úkimet basshysy kóterilgen máselelerdiń barlyǵy jáne Qarmet-tiń aldaǵy jumysy memlekettiń baqylaýynda bolatynyna sendirdi.
«Jańa ınvestor óndiristi jańǵyrtýǵa jáne qaýipsizdik deńgeıin arttyrýǵa aýqymdy ınvestıtsııalar salý boıynsha mindettemeler qabyldady. Bul bos sóz emes, munyń bári qaǵazǵa qattalǵan jáne memlekettiń baqylaýynda bolady. Prezıdent barlyq tıisti tapsyrmany berdi. Kombınattyń tynysy keńeıip, jańa ómirge jol ashatynyna senimdimiz. Bul – otandyq ónerkásiptiń maqtanyshy. Biz óz tarapymyzdan baqylap, jan-jaqty qoldaý kórsetetin bolamyz», — dedi Oljas Bektenov.
Sonymen qatar Premer-Mınıstr salalyq vedomstvolar basshylarynyń, jańa ınvestordyń, ákimdik ókilderiniń jáne kásiporyn qyzmetkerleriniń qatysýymen Qarmet-tiń ózekti máselelerin sheshý jáne odan ári damytý jóninde keńes ótkizdi.
Saran ındýstrııalyq aımaǵyn aralaý kezinde Úkimet basshysy 2021 jyly iske qosylǵan avtobýs shyǵaratyn «Qaztehna» zaýytynyń jumysymen tanysty.
Búgingi tańda kásiporynda shaǵyn torapty qurastyrý, dánekerleý jáne boıaý tsehtary jumys isteıdi. 2023 jyly munda 1 700-ge jýyq avtobýs shyǵaryldy. Zaýyttyń ónimi Qazaqstannyń ishki naryǵyna, sondaı-aq EAEO elderine jiberiledi.
Sodan keıin Oljas Bektenov avtomobıl shınalaryn shyǵaratyn «KamaTyresKZ» kásipornyna bardy.
Jobaǵa 214 mlrd teńgeden astam ınvestıtsııa salyndy. Jobalyq qýaty jylyna 3,5 mln jeńil, jeńil júk jáne júk shınasyn quraıdy. Qazirgi ýaqytta munda jabdyqtardy montajdaý jáne iske qosý, retke keltirý jumystary júrip jatyr.
