Premer-mınıstr qaldyqtardy óńdeýge qatysty ákimdikterge birqatar tapsyrma júktedi
ASTANA. KAZINFORM – Premer-mınıstri Oljas Bektenov qaldyqtardy energetıkalyq kádege jaratý jobalary Qazaqstannyń birqatar óńirinde júzege asyrylatynyn aıtty.
- Álemniń kóptegen damyǵan elderi qaldyqtardy jınaqtaýdan birtindep tuıyq tsıkldy ekonomıkaǵa kóship jatyr. Bul óz kezeginde, elektr energııasyn óndirýge jáne óndiriste qaıta paıdalanýǵa bolatyn shıkizat alýǵa múmkindik beredi. Tujyrymdama qalyptasqan tásilderdi ózgertip, salanyń ınvestıtsııalyq áleýetin arttyrýdy jáne qoldanystaǵy ınfraqurylymdy jańǵyrtýdy qamtamasyz etedi. Osyǵan oraı usynylǵan Tujyrymdama jobasyn maquldaýdy usynamyn, - dedi O. Bektenov.
Sonymen qatar Premer-mınıstr Ekologııa mınıstrligi memlekettik organdarmen ári óńir ákimdikterimen birlesip, Tujyrymdamada josparlanǵan is-sharalardyń jáne ony iske asyrý jónindegi is-qımyl josparynyń ýaqtyly oryndalýyn qamtamasyz etýin tapsyrdy.
- Ekinshiden, Ekologııa mınıstrligi Astana, Almaty jáne Shymkent qalalarynyń ákimdikterimen birge kelesi jyly qaldyqtardy energetıkalyq kádege jaratý zaýyttarynyń qurylysyn bastaýy kerek. Úshinshiden, qoldanystaǵy bıýdjet zańnamasyna sáıkes, qorshaǵan ortaǵa emıssııalar jáne basqa da ekologııalyq tólemder jergilikti bıýdjetke baǵyttalyp jatyr. Alaıda, óńirler osy qarajat esebinen ekologııalyq máselelerdi sheshý úshin tıisti jumys júrgizbeı otyr. Osyǵan baılanysty Ekologııa mınıstrligine oblystardyń ákimdikterimen birge ekologııalyq tólemder esebinen qaldyqtardy jınaý, qaıta óńdeý jáne kádege jaratý ınfraqurylymyn qurý men qarjylandyrý sharalaryn qabyldaýdy tapsyramyn, - dedi Úkimet basshysy.
Budan buryn habarlanǵandaı, búgin Úkimet otyrysy QR Ekologııa jáne tabıǵı resýrstar vıtse-mınıstri Jomart Álıev qaldyqtardyń barlyq túrin basqarý jónindegi tujyrymdama jobasyn tanystyrdy.