Premer-mınıstr emtıhan kezinde balalardyń qaýipsizdigin qamtamasyz etýdi tapsyrdy

- Kezekti oqý jyly aıaqtaldy. 200 myńnan astam túlek úshin bul – óte mańyzdy eseıý kezeńi, emtıhan tapsyrady, Ulttyq biryńǵaı testileýden ótedi, ýnıversıtetterge túsedi. Kópshiligi jazǵy demalysqa shyǵady. Osy jaýapty kezeńdi tıisti deńgeıde ári qaýipsiz ótkizý - barlyq memlekettik organdar úshin ortaq mindet. Árbir mektep oqýshysy, árbir túlek, árbir stýdent úshin oqý jylyn sátti aıaqtaýǵa jáne jazǵy demalysty tolyqqandy ótkizýge qolaıly jaǵdaı jasalýy tıis. Oqý-aǵartý, Ǵylym, Densaýlyq saqtaý, Іshki ister, Tótenshe jaǵdaılar mınıstrlikteri men ákimdikter emtıhandar men mektep bitirý sharalary kezinde túbegeıli qaýipsizdik sharalaryn qabyldaýy qajet. Óńir ákimdikteri, Oqý-aǵartý jáne Densaýlyq saqtaý mınıstrlikteri osy aptanyń sońyna deıin balalardyń demalys jáne saýyqtyrý ortalyqtarynyń tolyq daıyndyǵyn qamtamasyz etsin, - dedi O. Bektenov.

Onyń aıtýynsha, barlyq obektiler sanıtarııalyq, órt jáne terrorızmge qarsy qaýipsizdik talaptaryna saı bolýǵa tıis.

- Taǵam sapasyn, ınjenerlik ınfraqurylymnyń jaı-kúıin, medıtsınalyq qoldaý jáne kadrlarmen qamtamasyz etý barysyn udaıy baqylaýda ustańyzdar. Balalarmen jáne jasóspirimdermen tárbıe jumysynyń mańyzyna erekshe kóńil bólý kerek. Jaz maýsymynda jańa Konstıtýtsııa men jasandy ıntellekt negizderin bilim berý júıesinde oqytýǵa arnalǵan barlyq oqý baǵdarlamalary men ádistemelik usynymdardy ázirleý jumystaryn aıaqtaý qajet. Memleket basshysy «Adal azamat» býynyn daıyndaý — atap aıtqanda, ádil, eńbekqor jáne jaýapty azamattardy tárbıelep shyǵarý mindetin qoıdy. Sondyqtan barlyq bilim berý-saýyqtyrý jáne mektep janyndaǵy ortalyqtardyń baǵdarlamalary balalardyń bos ýaqytyn uıymdastyrýǵa ǵana emes, azamattyq, adamgershilik jáne mádenı qundylyqtardy dáripteý isine de baǵyttalýy kerek. «Zań men Tártip» qaǵıdattaryn, memleketke, qoǵamǵa jáne eńbekke degen qurmetti nasıhattaýǵa baǵyttalǵan shyǵarmashylyq jáne tanymdyq jobalardy, pikirtalas alańdary men aktsııalar ótkizý qajet, - dedi Úkimet basshysy.

Onyń sózine qaraǵanda, sonymen qatar «Taza Qazaqstan» jalpyulttyq bastamasy sheńberinde jazǵy jumyspen qamtý baǵdarlamalaryna ekologııalyq aktsııalardy, volonterlik jobalardy, aýmaqtardy abattandyrý, ekologııalyq mádenıetti qalyptastyrý jáne qorshaǵan ortaǵa uqypty qaraý sharalaryn engizý qajet.

- Balalar erte jastan óz aýlasyndaǵy, mektebindegi, aýylyndaǵy, qalasyndaǵy tazalyq pen tártip úshin tikeleı jaýapkershilikti sezine bilýi kerek. Prezıdent atap ótkendeı, zańdy qurmetteý, tabıǵatty aıalaý, jasampaz patrıotızm qaǵıdattary óskeleń urpaqtyń sanasynda túbegeıli ornyǵýǵa tıis. Oqý-aǵartý, Mádenıet jáne aqparat, Týrızm jáne sport mınıstrlikterine balalardyń minez-qulyq mádenıetin jan-jaqty qalyptastyrý jónindegi jol kartasyn jedel ázirleýdi tapsyramyn. Onda salamatty ómir salty, sportpen shuǵyldaný, dástúrli qundylyqtar men mádenıetti qurmetteý, durys tamaqtaný, kúndelikti ómirde jáne qoǵamdyq oryndarda qaýipsiz minez-qulyq, jeke gıgıena qaǵıdattary túgel eskerilýge tıis. Kámeletke tolmaǵandar arasyndaǵy quqyq buzýshylyq profılaktıkasyna nazar aýdaryp, mádenıetsizdik pen vandalızm kórinisterine belsendi túrde qarsy turý qajet. Jaqynda Memleket basshysy osy máselege erekshe nazar aýdardy. Ony sheshýge erte jastan bastap kirisý kerek. Eń aldymen, minez-qulyq mádenıeti, kitap oqýǵa degen súıispenshilikti dáripteý, óz eli men álem tarıhyn bilý sııaqty qundylyqtarǵa basa mán berilýge tıis, - dedi Premer-mınıstr.

Budan buryn habarlanǵandaı, oqýshylardyń jazǵy demalysy ortalyqtaryna polıtsııa ınspektorlary bekitildi.