Premer-mınıstr: Elimizde taǵy eki AES salynatyn oryndy anyqtaý jumystary bastaldy

ASTANA. KAZINFORM – Premer-mınıstr Oljas Bektenovtiń «Іlgerileýge bastaǵan alty jyl: Qazaqstan ornyqty damý jolynda» maqalasynda 2019 jyldan beri energetıka salasynda atqarylǵan irgeli isterdi sholyp ótken.

Oljas Bektenovtiń paıymdaýynsha, kommýnaldyq sharýashylyq jáne energetıka salasyndaǵy daǵdarystyń eń aýyr kezeńi artta qaldy.

- Prezıdenttiń basshylyǵymen elimizdiń ınfraqurylymyn aýqymdy jańǵyrtý jumystary júrgizilýde.

Uzaq jyldar boıy jylý energetıkasy sektoryna tıisti kóńil bólinbeı keldi: respýblıka boıynsha ınfraqurylymdyq jelilerdiń tozý deńgeıi 65%-ǵa, al jekelegen óńirlerde tipti 90%-ǵa jetti. Qazir energetıka jáne kommýnaldyq salalardaǵy daǵdarystyń aýyr kezeńin eńsere aldyq. Eger 2019 jyly jylý kózderiniń ortasha tozý deńgeıi 71%-ǵa jetse, qazir ony 61%-ǵa deıin tómendetýge múmkindik týdy. Bul jumys jalǵasady, - dep jazady ol maqalada.

Úkimet basshysy byltyr Memleket basshysynyń tapsyrmasymen 86 myń shaqyrym ınjenerlik jelini jańǵyrtyp, jańa qýat kózderin iske qosýdy kózdeıtin Ulttyq joba iske asyryla bastaǵanyn atap ótken. Úkimet bul joba oıdaǵydaı iske assa, tehnologııalyq apattar sanyn 20%-ǵa qysqartyp, energetıkalyq jáne kommýnaldyq sektorlardyń tozý deńgeıin orta eseppen 40%-ǵa azaıtýǵa, generatsııany 7 GVt-tan astam arttyrýǵa múmkindik beredi. Atalǵan baǵdarlamany iske asyrǵan kezde qazaqstandyq ónim shyǵaratyn kásiporyndardyń áleýetin tolyq paıdalaný josparlanyp otyr. Qazaqstandyq kompanııalardyń josparlanǵan ónim kólemi shamamen 3,5 trıllıon teńge dep baǵalanǵan.

- 2019 jyldan beri elektr energııasyn tutyný 14%-ǵa ósip, shamamen 120 mıllıard kVt/saǵ qurady. Halyq sanynyń ósýin, sondaı-aq júrgizilip jatqan ındýstrııalyq damý jáne tsıfrlandyrý saıasatyn eskere otyryp, energııa tutyný odan ári arta túsedi dep boljanyp otyr. Osyǵan oraı Prezıdent tapsyrmasy boıynsha ıadrolyq energetıkany damytý qolǵa alyndy. Birinshi AES qurylysynyń aýdany anyqtaldy. Taǵy eki stantsııa salý úshin qurylys oryndaryn anyqtaý jumystary bastaldy, - deıdi Úkimet basshysy.

Aıta ketý kerek, ótken aptada ǵana Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev Qazaqstanǵa úsh atom elektr stansasyn salý kerektigin aıtqan edi.